“Bu vaqonu bura qoyandan sonra icra hakimiyyətindən, JEK-dən mənə təzyiq olub. Polisdən neçə dəfə gəlib məni təhqir ediblər”-Rüxsarə Həsənova vaqona keçə-keçə bu vəziyyətdə yaşamağın çətinliyindən danışır.
Ağdam rayonundan köçkün düşən Həsənovlar ailəsi 1 il 6 aydır vaqonda yaşayır. Kirayə pulun çatdırmayınca, evdən çıxıb kreditə vaqon alan ailə borclarını ödəyəndən sonra vaqonun yanında hamam, tualet tikmək istəyiblər. Amma hər dəfə tikintiyə başlayanda Xətai rayon İcra Hakimiyyətindən gəlib tikdiklərini sökürlər. “ Burada nə hamamımız, nə tualetimiz var. Üzr istəyirəm, bu qonşunun hamam, tualetindən istifadə edirdik. İndi qonşu açarın bizdən alıb, evin kirayə verib qalmışam belə… Tikməyə də icazə vermirlər. Deyirəm, heç olmasa öz hesabıma tikim, razı olmadılar. Burada yataqxana var, oradan yer istədim. Xahiş etdim ki, heç olmasa orada alt qatdan bir boş ev versinlər yığışım ora. Ona da imkan vermədilər”.
Vaqon 3 metr enində, 6 metr uzunluğundadır. İçərisində 4 nəfər yaşayır. Vaqonun tən ortasından paltar dolabı (şifonyer) qoyulub. Onun bir tərəfi yataq,o biri tərəfi qonaq otağıdır. Vaqonun özü isə suyun içindədir. Valideyn deyir ki, rütubətdən evin sonbeşiyi xəstəlik tapıb. “Mətbəxim, yataq otağım, qonaq otağım hamısı vaqonun içindədir. Yeməyimdi, içməyimdi, yatmağımdı, durmağımdı, hamısı buradadır. Hətta yağış yağanda ayaqqabımı gətirib içəridə soyunuram. Mənə burada “ayaq altı” eləməyə və ya tualet, hamam tikməyə icazə vermirlər”.
Şikayətçi deyir ki, icra hakimiyyəti hər dəfə yarımçıq tikilisini sökəndə “burada tikintiyə icazə yoxdur” səbəbini göstərir. Amma vaqonun ətrafında villalar ucaldılıb. Sakin sual edir ki, ərazidə tikintiyə icazə yoxdursa, bəs sahildə boy göstərən villaların tikintisinə niyə göz yumublar?
Evin böyük qızı Fidan Mədədzadə 3-cü sinifdə oxuyur. O, vaqonda dərs hazırlamağın çətin olduğundan danışır. Deyir, anası yemək hazırlayanda stolun üstündə yer qalmır, yatağa uzanıb dərslərini yazmalı olur. O, öz otağı olarsa, dərslərində daha yaxşı irəliləyəcəyini düşünür.
Biz evdən çıxandan sonra ailə növbəti dəfə hamam, tualet tikməyə cəhd edib. Bu dəfə də icra hakimiyyətinin nümayəndələri tikintini sökməyə gəliblər. Rüxsarə xanım deyir ki, ərazidə huşunu itirdiyi üçün söküntünü tam apara bilməyiblər.
Xətai Rayon İcra Hakimiyyətinin hüquq şöbəsinin müdiri Teymur Əzizov Rüxsarə Həsənovanın şikayət məktubunun onlara daxil olduğunu bildirir. O, ərizəni araşdırdıqlarını deyir.
1993-2014-cü illərdə qaçqın və məcburi köçkünlərin sosial problemlərinin həllinə ümumilikdə 5,1 milyard manat sərf olunub. Bu vəsaitlər dövlət büdcəsindən, Dövlət Neft Fondundan və ölkədə işləyən beynəlxalq təşkilatlardan ayrılıb. Qaçqınların və Məcburi Köçkünlərin işləri üzrə Dövlət Komitəsinin şöbə müdiri Sənan Hüseynov şikayətçi qadına göndərdiyi məktubda yazıb ki, 2011-ci ildə “Dövlət Proqramı” na təsdiq edilmiş “Əlavələr” ə əsasən Abşeron rayon Qobu qəsəbəsində torpaq sahəsi ayrılıb və hündürmərtəbəli yaşayış binalarından ibarət qəsəbənin tikintisinə başlanılacaq. Tikinti işləri başa çatdıqdan sonra ailənin yaşayış şəraiti nəzərə alınaraq yeni mənzillə təmin edilməsi məsələsinə baxıla bilər. Komitənin mətbuat xidmətindən suallarımızı cavablandıran olmadı.
Qadın yataqxanada belə yaşamağa razıdır. Yataqxanlarda boş otaqların olub-olmaması ilə maraqlanmaq üçün Bakı şəhər Mənzil Kommunal Təsərrüfat Departamenti ilə əlaqə saxladıq. Ümumi şöbədən bildirdilər ki, şikayətçi ərizə ilə onlara müraciət etsin. Bundan sonra ərizəni araşdırıb qadına cavab verəcəklər.
Qadın isə Bakıda yaşadığı çətinlikləri görüncə Ağdamda yaşadığı günləri təsəlli olsun deyə xatırlayır. İkimərtəbəli evdən çıxıb indi tikintisinə icazə verilməyən hamam, tualetin sökülmüş bucaqlarına baxır. “O gün qızım mənə bir söz dedi, o qədər təsir elədi. Dedi, ana, uşaqlar evimizin yerini soruşdu, mən uşaqlara vaqonu göstərə bilmədim, utandım. Bu söz mənə o qədər təsir elədi. Mən o həyatı yaşamışdım, heç olmasa uşağım o həyatı yaşamayaydı”.
Bu videonu izləyən hər kəs həm də MeydanTV-nin “Xalqın Xəbəri” vətəndaş jurnalistikası layihəsində iştirak edə bilər. Belə ki, qeyd etdiyiniz videoları, çəkdiyiniz fotoları, bildiyiniz məlumatları bizimlə paylaşa bilərsiniz.
Whatsapp nömrəmiz: +49 176 16263646
