Ukrayna Silahlı Qüvvələrinin əks-hücum əməliyyatı artıq Luqansk vilayətinə yaxınlaşır.
Bu barədə Luqansk hərbi administrasiyasının rəhbəri Sergey Qayday “Telegram” kanalında yazıb.
Onun sözlərinə görə, Ukrayna hərbçiləri Luqansk vilayətinin Lisiçansk şəhərinin kənarındadırlar:
“Svatovoda işğalçılarla onlarla əməkdaşlıq edənlər arasında çaxnaşma var”.
Ukrayna Silahlı Qüvvələri Baş Qərargahının yaydığı məlumatda Xarkov vilayətində və Yujnobuqski istiqamətində yaşayış məntəqələrinin azad edildiyi qeyd olunur.
Bu barədə Ukrayna Silahlı Qüvvələri Baş Qərargahının “Facebook”dakı əməliyyat məlumatında deyilir.
Baş Qərargah hərbçilərin təhlükəsizliyi üçün daha sonra rəsmi məlumat veriləcəyini qeyd edib.
Rusiya Müdafiə Nazirliyinin rəsmi nümayəndəsi general-leytenant İqor Konaşenko bildirib ki, İzyum və Balakliya bölgələrindəki rus qoşunları Donetsk istiqamətində səyləri artırmaq üçün yenidən qruplaşdırılıb:
“Bu, Ukraynada xüsusi əməliyyatın məqsədlərinə nail olmaq üçün edilib”.
“Rusiya qoşunlarına dəyən ziyanın qarşısını almaq üçün aviasiya, raket qoşunları və artilleriya qurğularından istifadə etməklə düşmənə güclü atəş zərbəsi vurulub”, – deyə Müdafiə Nazirliyinin rəsmisi əlavə edib.
Hərbi ekspert: “Rusiya qoşunlarının İzyum qrupunun maddi-texniki təminatı tamamilə kəsiləcək”
Ukrayna xüsusi təyinatlılarının Xarkov vilayətinin Kupyansk şəhərini azad etdiyi bildirilir.
Bu barədə sentyabrın 10-da Ukrayna Xüsusi Təyinatlıları “Telegram” kanalında məlumat yayıb.
“Biz torpaqlarımızı son santimetrinə qədər azad edəcəyik! İrəliləyəcəyik!”, – deyə mesajda deyilir.
Sentyabrın 9-da Ukrayna Prezident Volodimir Zelenski Xarkov vilayətində 30-dan çox yaşayış məntəqəsini azad etdiyini bildirib.
Hərbi ekspert Oleq Jdanovun sözlərinə görə, Kupyansk şəhərinin işğalçılardan azad edilməsi Rusiya qoşunlarının İzyum qrupunun maddi-texniki təminatını tamamilə kəsəcək.
Kupyansk şəhəri fevralın 27-də Rusiya ordusu tərəfindən işğal olunmuşdu.
Xatırlatma
Rusiya Prezidenti Vladimir Putin Ukraynanın şərqindəki separatçı qurumları tanıdığını bəyan etdikdən 2 gün sonra, fevralın 24-də Ukraynaya qarşı müharibəyə başlayıb.
Dünyanın əksər ölkəsi Rusiyanın hücumunu pisləyib. Bundan sonra Avropa Birliyi ölkələri, eləcə də ABŞ Rusiyaya qarşı sanksiyalar tətbiq edib. 600-dən çox rusiyalı oliqarx, yüksək rütbəli hərbçilər, şirkət sahibləri, biznesmenlərlə yanaşı, Rusiya Prezidenti Vladimir Putin və xarici işlər naziri Sergey Lavrov sanksiyalara məruz qalıblar. Rusiyada təşkil olunacaq yarışlar təxirə salınıb, bu ölkənin adı mühüm tədbirlərdən və təşkilatlardan çıxarılıb.
Aprelin 7-də isə BMT Baş Assambleyası Rusiyanın təşkilatın İnsan Hüquqları Şurasından çıxarılması ilə bağlı qətnamə qəbul edib. Rusiya isə Avropa Şurası üzvlüyündən çıxıb.
Rusiya ordusunun Buça və digər Ukrayna şəhərlərində kütləvi qətliamlar və müharibə cinayətləri törətdiyi iddia olunur.
İyunun 25-də Avropa İttifaqının 12 ölkəsi Rusiya qazının tədarükündən tamamilə və ya qismən imtina edib.
