Qubad İbadoğlu: ”Azərbaycanda iqtisadi artım tempi post-sovet məkanı üzrə ən aşağı səviyyədədir”
ÜDM-in artım tempinə görə isə Azərbaycan MDB dövlətləri arasında sonuncudur.
İqtisadçı Qubad İbadoğlu belə deyir.
“Hər gün ekranlarda rəsmi prizmadan Azərbaycanın analoqsuz inkişafından danışılır. Ancaq son 3 ildə MDB dövlətləri arasında austsayderlər sırasında olan ölkəmiz bu mövqeyini cari ildə də qoruyub saxlayıb”.
İqtisadçı qeyd edib ki, Azərbaycanda iqtisadi artım tempi post-sovet məkanı üzrə ən aşağı səviyyədədir.
O xatırladıb ki, 2018-ci il üçün ÜDM-in artımı ilə bağlı Azərbaycan hökumətinin və beynəxlalq təşkilatların hesabatlarında bu il üçün 1,8-2 faizlik artım proqnozlaşdırılmışdı.
“Lakin, gözləntilər yenə də özünü doğrultmadı. Dövlət Statistika Komitəsinin məlumatına görə, bu ilin 10 ayında ölkədə ÜDM 0,8 faiz artıb, o cümlədən qeyri-neft ÜDM-i 1faiz artıb. Halbuki, ötən ilin eyni dövründə qeyri-neft ÜDM-i artım tempində 2,1 faiz qeydə alınmışdı”.
Əhalinin hər nəfərinə düşən ÜDM gəlincə, iqtisadçı bildirib ki, bu ilin 10 ayında ötən ilin eyni dövrü ilə müqayisədə manatla 0,1 faiz azalıb:
“Bu o deməkdir, cari ilin ilk 10 ayında adambaşına iqtisadi artım olmayıb, əksinə analoqsuz inkişafın nəticsəində 0,1 faizlik eniş qeydə alınıb”.
