İkram Həsənov: Vaxt var idi mütəxəssis kimi baxır, başıma and içirdilər.

Mənbə: Meydan TV

Başlıq: İkram Həsənov: Vaxt var idi mütəxəssis kimi baxır, başıma and içirdilər.

Ucar sakini: Bir böyük ailə kimi acından ölməyə məhkumuq

“Mən işdən məcburiyyətdən ayrılmışam”

Ucarın Məlikballı kəndinin sakini, 57 yaşlı İkram Həsənovun şikayəti var. Deyir ki, 25 il dövlət qulluğunda çalışıb, problemlərinə və səhhətinə görə işdən kənarlaşmalı olub. Amma indi təqaüd ala bilmir. Bunun üçün dəfələrlə aidiyyəti qurumlara müraciət edib, ancaq bir nəticəsi olmayıb.

“25 il dənizdə, çətin şəraitdə işləmişəm. Vaxt var idi mütəxəssis kimi baxır, başıma and içirdilər. İndi saya salan yoxdur. Yoldaşım vaxtsız vəfat etdi, uşaqlarım tək qaldı. Özümün də ciyərlərimdə problem yarandı. Bir müddət çətinliklə olsa da, işlədim. Sonra gedə bilmədim, işdən çıxardılar. Elə ondan sonra da vəziyyətim getdikcə pisləşdi. İndi heç yerdə işləmirəm, üstəlik, xəstəyəm, iynə-dərmanımı ala bilmirəm. Hər dəfə həkim deyir, “yaxşı qidalanmalısan”. Hanı, mən heç pis də qidalana bilmirəm”.

İkram Həsənovun ilk evliliyindən 5, ikinci evliliyindən 1 övladı var. Deyir, sonuncu övladı məktəblidir, təhsilinə xərcləməyə pulları olmur. Bəzən günlərlə ayaqqabısı, çantası, geyimi olmadığı üçün dərsdən qalır:

“Çatdıra bilmirəm. Böyük oğlanlarım bir ara Bakıda fəhləlik edirdilər, birtəhər dolanırdıq. Koronavirus söhbəti çıxandan Bakının yolları bağlandı. Onlar da işsizdir, hamımız oturmuşuq evdə. Bir böyük ailə kimi acından ölməyə məhkumuq”.

İkram Həsənov təqaüd almaq istəyir. Deyir, ünvanlı sosial yardımdan əlini üzüb. Çünki o qədər sənəd istəyiblər ki, onları toplaması mümkün deyil:

“Eynilə birdəfəlik yardım kimi... Almaq üçün çox ağır şərtlər qoymuşdular. Odur ki, pensiya istəyirəm. Ona da deyirlər ki, yaşın çatmır. Dedim, 25 il can qoymuşam, dedilər, işdən erkən, öz istəyinlə ayrılmısan. Niyə ayrılmışam? Onu soruşmurlar heç. Yoldaşım vaxtsız vəfat etdi. Uşaqlarım qaldı başsız. Yanında qoymağa heç kimim olmadı. Normal dövlətlərdə baxıcı müəyyən edilir və bunun üçün valideynin əmək haqqına əlavələr olur. Bizdə heç birini etmədilər. Çünki işçinin qiyməti yoxdur. Fikirləşirlər ki, nə çox işsiz, birini tapıb işlədəcəyik. Mən işdən məcburiyyətdən ayrılmışam. Sonra uşaqlar böyüdükcə xəstəlik tapdım, iş qabiliyyətimi itirdim. Yenə də cəhənnəm, deyirəm, nəsə iş olsa, işləyərəm, amma yoxdur”.

“25 il dənizdə, çətin şəraitdə işləmişəm".

“25 il dənizdə, çətin şəraitdə işləmişəm".

Mənbə: Meydan TV

Şikayətçi deyir ki, bu gedişlə o təqaüd yaşına çata bilməyəcək. Heç olmasa, xəstəliyinə görə güzəştə gedib onu təqaüdə tez çıxarsınlar:

“8 nəfərlik ailəyik. 6 uşaq, özüm, bir də həyat yoldaşım. Evimizə bu gün bir qəpik də girmir. Oğlum arada fəhləlik edir. O da olanda. Bilirsiniz də, rayonda iş tapmaq asan deyil. Qonşular, qohumlar kömək edir, birtəhər dolanırıq. Bu, nə qədər belə davam edə bilər, bilmirəm”.

İkram Həsənov deyir ki, düzdür, kənddə yaşayır, ancaq heyvandarlıqla da məşğul ola bilmir. Çünki bunun üçün sərmayəsi yoxdur:

“Pensiya, sosial yardım vermirlər, yəqin ölməyimizi istəyirlər. Təsərrüfatla da məşğul ola bilmirik. Su yox, şərait yox. Heyvan saxlamaq üçün də gərək bir az pulun olsun ki, heyvan alasan. Əlimizdə bir evdir. Başqa heç nəyimiz yoxdur”.

Dövlət Sosial Müdafiə Fondunun Ucar Rayon Şöbəsindən bildirilib ki, yardım üçün o qədər böyük sənəd tələb edilmir. Sadəcə elektron qaydada qeydiyyatdan keçmək lazımdır:

“Düzdür, bir neçə sənəd tələb edilir. Onlar da əldə edilməsi mümkün sənədlərdir. Həm sosial yardım istəyirlər, həm də sənəd toplamaq istəmirlər, axı bu, mümkün olan bir şey deyil. Yəni dövlətin müəyyən etdiyi bəzi qaydalar var, bəzi sənədlər tələb olunur və bunlar təqdim edilməlidir. Təbii, yardıma uyğun vəziyyətdirsə, mütləq veriləcək”.

Ucar Rayon Məşğulluq Xidmətindən isə deyilib ki, hazırda mövzümi işlər çoxdur. Ailə müraciət etsə, onları işlə təmin edərlər.

Buradaykən …

Sizdən kiçik bir xahişimiz var: Fəaliyyət göstərdiyimiz mühitdə məlumatlar dövlətin çox sıx nəzarəti altındadır. Meydan TV insanların keyfiyyətli və müstəqil informasiya ilə təmin etmək üçün çalışır. Biz sizin eşidə bilmədiyiniz, amma eşitmək istədiyinizə inandığımız hekayələri işıqlandırırıq. Dövlət senzurasının – rəsmi bloklanmanın və təzyiqlərin gücləndirilməsinə baxmayaraq, biz, müstəqil jurnalist komandası ağır şərtlər altında Azərbaycan xalqının dolğun, keyfiyyətli informasiya ilə təmin edilməsinə çalışırıq və bunun üçün sizin köməyiniz lazımdır.

Sizin dəstəyiniz bizim böyük risk altında işləyən jurnalistlərimizə güc verir. Azərbaycanda müstəqil jurnalistikanın qorunması üçün edilmiş hər bir cəhd sizin töhfənizdir. Çox sağ olun.

BIZƏ DƏSTƏK OLUN
Bölmələr:  
qısa linklər:   http://mtv.re/eb0z3g

Ən çox baxılan