Emin Əmirullayev savadlı yaşlı müəllimlərin sistemdə qalmasının tərəfdarıdır
“Sertifikatlaşma imtahanında iştirak edən hər 4 müəllimdən biri, yəni 24%-i minimal balı toplaya bilməyib. Müəllimlər öz fənləri ilə bağlı ən sadə suallara cavab verə bilməyib”.
Bunu elm və təhsil naziri Emin Əmrullayev Milli Məclisdə “Dövlət ümumi təhsil müəssisələrində işləyən təhsilverənlərin sertifikatlaşdırılması” mövzusunda keçirilən ictimai dinləmədə deyib:
“Əgər biz bu gün həmin müəllimlər barədə qərar verməsək, uşaqlarımızın gələcəyi olmayacaq. Bizim fikrimizcə, aşağı nəticə göstərən müəllim uşaqlara dərs deməli deyil. Başa düşürəm, onlar öz evlərində yaxşı ana, bacıdır. Amma biz uşaqların gələcəyini düşünməliyik. Biz demirik ki, həmin müəllimləri birbaşa ataq qırağa. Amma həmin müəllimlərə diplom verən, işə götürən də məsuliyyət daşıyır. Təkcə müəllimin üzərinə məsuliyyət yükləmək olmaz. Amma biz indi bu ağır qərarları verməsək, sonra çətin olacaq”.
Nazir həmçinin qeyd edib ki, 2023-cü ildə 7-10 min arası müəllim imtahandan keçiriləcək.
O bildirib ki, özəl sektorda çalışan müəllimlər sertifikasiya imtahanlarına cəlb edilməyəcək və bu məsələ hələ nəzərdə tutulmur.
Nazir həmçinin yaşlı müəllimlərin nəticələrinə də toxunub.
“Elə müəllimlər var ki, 65 yaşı var, amma sertifikasiya imtahanında yüksək nəticə toplayıb. Təbii ki, həmin şəxslərin sistemdə saxlanmasının tərəfdarıyam”, – o deyib.
Emin Əmrullayev çıxışı zamanı saxta diplomlardan da danışıb.
Nazir qeyd edib ki, ölkədə əvvəllər külli miqdarda saxta diplomlar verilib:
“Saxta diplomların verilməsi ilə əlaqədar məhkəmə işləri, faktlar var. Amma biz yenə də həmin müəllimlərin biliklərini yoxlayırıq ki, əgər biliyi varsa, davam etsin. Bu da əlavə şansdır”.
İctimai dinləmə zamanı deputat Ceyhun Məmmədov bildirib ki, təhsildə olan problemləri kökündən həll etmək lazımdır:
“Problemin olmasından çoxları məsuliyyət daşıyır. Həmin müəllimləri kimlər işə qəbul edib, onlar necə məzun olublar? Bu suallara cavab verilməlidir. Fənnini bilməyən müəllimlər niyə gəlib dərs deməlidir? Eyni zamanda, bu gün sertifikasiyadan keçməyən müəllimlər var. Digər tərəfdən təhsildə tanışlıq məsələsini də aradan qaldırmalıyıq. Bu gün vəzifə başına gələn öz dostunu, qohumunu yanına gətirir. Bunun qarşısını almaq lazımıdır”.
Deputat Musa Qasımlı direktorların təyinatını tənqid edib:
“Hər kəs yaxşı bilir ki, müstəqilliyin ilk illərində ölkədə çobanlar məktəblərə direktor təyin olunurdu”.
O çıxışında deyib ki, məktəb direktorlarının çoxu tapşırıqla təyin olunub:
“Çobanın rəhbərlik etdiyi məktəbdən nə gözləmək olar. Adını yaza bilməyən biri məktəbi idarə edirsə, onda uşağa heç nə demək olmaz. Təhsil sahəsində islahatlar aparmaq lazımdır, yoxsa vəziyyət ürəkaçan olmayacaq. Kiminsə qohumları, tanışları yığışdırılmalıdır. Bunun qarşısını almasaq, bizi gələcəkdə fəlakət gözləyir”.
Milli Məclisin İqtisadi siyasət, sənaye və sahibkarlıq komitəsinin sədri Tahir Mirkişili isə müəllimlərin maaşlarının artırılması təklifi ilə çıxış edib:
“Bu gün təhsil sahəsində iki mühüm sosial sifariş var. Birincisi, təhsilin keyfiyyəti, ikincisi isə müəllimin əməkhaqqı artmalıdır. Növbəti ilin dövlət büdcəsindən müəllimlərin əməkhaqlarının artırılması üçün 56 milyon manat, diaqnostikadan keçən müəllimlərin əməkhaqqının artırılması üçün isə 168 milyon manat ayrılması nəzərdə tutulur”.
“Sertifikatlaşdırmanın keçirilməsi vacib qərardır. Bu proses məktəblərdə hökmən getməlidir. Bütövlükdə, bu gün şagirdlərin yaxşı təhsil alması və müəllimlərin əməkhaqqının artırılması üçün sertifikatlaşdırma aparılmalıdır”, – deyə o qeyd edib.
