17.03.
İlahiyyatçı Taleh Bağırzadənin polis idarəsindən buraxıldığı bildirilir.
“Müsəlman Birliyi Hərəkatı”nın sədri, ilahiyyatçı Taleh Bağırzadə Yevlax rayonunda saxlanılıb.
İlahiyyatçı AzadXeber.az-a verdiyi açıqlamasında cümə namazını qılmaq üçün yerli məscidlərdən birinə getdiyini deyib.
Bu zaman silahlı hüquq-mühafizə orqanlarının əməkdaşları tərəfindən saxlanılaraq polis bölməsinə aparılıb. Tale Bağırzadə bir anda məscidin mühasirəyə alındığını və polisin onu axtardığını bildirib.
İlahiyyatçı önə çıxaraq özünü təqdim edib və bundan sonra əli silahlı orqan işçiləri tərəfindən bölməyə aparılıb. İdarədə bildiriblər ki, Daxili İşlər Nazirliyinin “102” qaynar xəttindən onlara zəng gəlib və ilahiyyatçının hakimiyyət əleyhinə çıxış edəcəyi haqda məlumat verilib.
Lakin 3 saata yaxın bölmədə saxlanılan Tale Bağırzadəyə qarşı heç bir əsaslı dəlil olmadığından, o, sərbəst buraxılıb. İlahiyyatçı baş verən hadisədən inanclıların narahatlıq keçirdiyini deyib: “Çağırılmağın qaydası var, heç bir cinayət törətməyən şəxsi silah-sursatla bölməyə aparmaq qanuna sığmır. İnanclı insanlar buna öz etirazlarını bildirdilər”
16:25
Yevlax rayon Polis Şöbəsindən Tale Bağırzadənin idarədə olması faktını nə təkzib, nə də təsdiq etdilər. Adını açıqlamayan idarə rəsmisi məlumat verməkdən imtina etdi. Daxili İşlər Nazirliyinin mətbuat xidmətinin rəsmisi Ehsan Zahidov isə məsələni araşdırıb məlumat verəcəyini desə də, sonrada dəfələrlə zəng etməyimizə baxmayaraq cavab vermədi.
15:17
Meydan TV AzadXeber.az-a istinadən xəbər verir ki, bu barədə Tale Bağırzadənin yaxınları məlumat verib.
Məlumatda qeyd olunur ki, Tale Bağırzadə bu gün səhər saatlarında ailəsi ilə birlikdə Yevlax rayonuna səfər edib. O, rayon məscidlərindən birində çıxış edən zaman hüquq-mühafizə orqanları əməkdaşları tərəfindən saxlanılıb.
Bildirildiyinə görə, T.Bağırzadəni apararkən dindarlarla hüquq-mühafizə əməkdaşları arasında qarşıdurma yaranıb. Onlar dindarlara ilahiyyatçının 20 dəqiqədən sonra buraxılmasına söz versələr də, bu, həyata keçirilməyib. MHB sədrinin saxlanıldığı bölmə xüsusi təyinatlılarla əhatə olunub.
T.Bağırzadəylə birgə daha bir neçə dindarın saxlanıldığı bildirilir.
Yevlax Rayon Polis İdarəsi ilə əlaqə yaratsaq da, oradan bizə kobud şəkildə “Başımız qarışıqdır. Bir saat sonra məlumat verəcəyik” – dedilər.
Məsələni diqqətdə saxlayırıq.
