Vəkil Elçin Sadıqov: “Şirin ifadəsində göstərib ki, işgəncəyə məruz qalıb, onların istədiyi şəkildə ifadə verməyə məcbur edilib”
Meydan TV ilə əməkdaşlıq edən jurnalist Şirin Abbasovun (Şirin Tire) Baş Mütəşəkkil Cinayətkarlığa Qarşı Mübarizə İdarəsində (“Bandotdel”) üzləşdiyi işgəncə faktları ilə bağlı Respublika Prokurorluğuna müraciət olunub. Faktı Meydan TV-yə Şirin Abbasovun vəkili Elçin Sadıqov təsdiqləyib: “Bununla bağlı Şirin Abbasovun yazılı ifadəsi də var. O, ifadəsində göstərib ki, Baş Mütəşəkkil Cinayətkarlığa Qarşı Mübarizə İdarəsində işgəncəyə məruz qalıb, onların istədiyi şəkildə ifadə verməyə məcbur edilib. Bu faktla bağlı artıq Respublika Prokurorluğuna şikayət etmişik”.
Şirin Abbasov 16 sentyabr 2015-ci il tarixində təhsil aldığı Bakı Dövlət Univeristetinə gedərkən Yasamal rayonu, A.Abbasov küçəsində özünü polis kimi təqdim edən mülki şəxslər tərəfindən saxlanılıb və Yasamal rayon Məhkəməsinin qərarı əsasında İnzibati Xətalar Məcəlləsinin 296-cı (xırda xuliqanlıq) və 310.1-ci (polisin qanuni əmrinə tabe olmama) maddələri ilə 30 sutka məhkum olunub. O, həmin müddətdə Baş Mütəşəkkil Cinayətkarlığa Qarşı Mübarizə İdarəsində saxlanıb və vəkili ilə görüşməsinə imkan yaradılmayıb. Vəkil Elçin Sadıqova Şirin Abbasovun ondan imtina etdiyi deyilib.
“Vəkildən imtina ilə bağlı Şirin Abbasov bildirib ki, o, heç vaxt vəkildən imtina etməyib. Əksinə, həmişə vəkili ilə görüş tələb edib. Dövlət hesabına təyin edilmiş vəkili, ümumiyyətlə, görməyib və o, BMCMİ-yə onunla görüşə gəlməyib” – deyə Elçin Sadıqov Facebook səhifəsində qeyd edib.
