Oktyabrın 21-də Azərbaycanın Prezidenti İlham Əliyev Mərkəzi Klinik Xəstəxanasında Türkiyənin Ədalət və İnkişaf Partiyası sədrinin müavini Binoəli Yıldırıma, millət vəkili Şamil Ayrıma və mühafizəçi Oğuzhan Dəmirçiyə baş çəkib.
“President.az”ın məlumatına görə, onların hər üçü qəza yerindən operativ olaraq helikopterlə Bakıya xəstəxanaya çatdırılmalarına və dərhal tibbi müayinədən keçirilərək müalicə almalarına görə İlham Əliyevə və tibb heyətinə minnətdarlıqlarını bildiriblər.
Hər üç şəxs Mərkəzi Klinik Xəstəxanasına yerləşdiriliblər
Azərbaycanda səfərdə olarkən yol qəzası keçirən Türkiyənin Ədalət və İnkişaf Partiyası sədrinin müavini Binəli Yıldırım, millət vəkili Şamil Ayrım və mühafizəçi Oğuzhan Dəmirçi Mərkəzi Klinik Xəstəxanasına yerləşdiriliblər və həkim nəzarəti altındadırlar.
Bu barədə Səhiyyə Nazirliyi məlumat yayıb.
Mərkəzi Klinik Xəstəxanasına istinadən verilən məlumatda deyilir ki, hər üç şəxsin vəziyyəti qənaətbəxşdir. Həyatları üçün hər hansı bir təhlükə yoxdur, yaxın saatlarda onların evə yazılacağı gözlənilir.
Türkiyəli rəsmilər Prezident Rəcəb Tayyib Ərdoğanın Azərbaycana səfəri çərçivəsində işğaldan azad olunmuş bölgələrə gediblər.
Türkiyə mətbuatının məlumatına görə, onların olduğu avtomobil Cəbrayıldan dönərkən döngəni keçə bilməyib və qəzaya uğrayıb.
Qəza nəticəsində təhlükəsizlik yastıqları açılan avtomobildən çıxarılan B.İldırım təcili yardımla hadisə yerini tərk edib.
Oktyabrın 20-də Türkiyənin Prezidenti Rəcəb Tayyib Ərdoğan Zəngilan hava limanının açılışında iştirak edib.
Türkiyə dövlət başçısı Cəbrayıl şəhərində rəsmi qarşılanma mərasimindən sonra Azərbaycanın Prezidenti İlham Əliyevlə təkbətək görüşüb.
Binəli Yıldırım 2016-2019-cu illərdə Türkiyənin Baş naziri olub.