Rusiya səhiyyə naziri Veronika Skvortsova: Partlayış nəticəsində 10 nəfər ölüb, 47 nəfər yaralanıb.
***
Sankt-Peterburqda terror aktı nəticəsində həlak olanların sayı artıb.
Bu barədə Rusiyanın səhiyyə naziri Veronika Skvortsova aprelin 4-də bildirib ki, ölənlərin sayı 14-ə çatıb.
***
“Sankt-Peterburqda metro stansiyalarındakı partlayışlar nəticəsində ölən və yaralananlar arasında azərbaycanlı yoxdur”
, – “Report”un Rusiya bürosuna açıqlamasında Azərbaycanın Sankt-Peterburqdakı baş konsulu Sultan Qasımov deyib.
“Müvafiq xidmətlərlə əlaqədəyik və yeni məlumat olacağı təqdirdə xəbər veriləcək”, – S.Qasımov bildirib.
O, hadisə yerində istintaq qrupunun işlədiyini vurğulayıb.
***
Rusiya baş prokuroluğunun nümayəndəsi Aleksandr Kurennoy “Rusiya-24”-ə açıqlamasında metroda baş verən partlayışın terror aktı olduğunu söyləyib. O bildirib ki, bütün məqamların dəqiqləşdirilməsi üçün əllərindən gələni edirlər:
“Terror aktının həyata keçirilməsinə şərait yaradan səbəblər araşdırılır ki, gələcəkdə belə hadisələr təkrarlanmasın”.
***
Sankt-Peterburqda metronun “Texnoloqiçeskiy institut” və “Sennaya ploşşad” stansiyalarında baş vermiş partlayışlar nəticəsində 10 nəfər ölüb, 50-yə yaxın adam yaralanıb. Metro stansiyaları bağlanıb.
Metronun “Ploşşad Vosstaniya” stansiyasında da partlayıcı qurğu tapılıb.
Məlumatı “Fontanka” saytı yayıb. Partlayıcı qurğu işə düşməyib. Hazırda bomba zərərsizləşdirilir.
***
Rusiya prezidenti Vladimir Putin metrodakı partlayışla bağlı açıqlama verib.
TASS yazır ki, belaruslu həmkarı ilə görüşü zamanı Putin partlayışla əlaqədar bütün versiyaların araşdırıldığını deyib. O, hələlik partlayışın səbəblərinin məlum olmadığını bildirib.
***
Ölən və yaralananlar var
Aprelin 3-də, günorta saatlarında Sankt Peterburq metrosunda partlayış olub. Partlayış zamanı ən azı 10 nəfər həyatını itirib.
Məlumatı RİA Novosti və Rusiyanın digər kütləvi informasiya vasitələri veriblər.
Hadisə şahidləri ölən və yaralıların olduğunu bildirirlər. Hələ ki, rəsmi açıqlama verilməyib.
