Rüstəm İbrahimbəyov Ramiz Mehdiyev və Əli Həsənovun işdən çıxarılmalarını alqışladı

“Mən bu addımları tam dəstəkləyirəm və əgər ehtiyac duyularsa hakimiyyətə bu məsələdə tam dəstək verməyə hazıram”, – Rüstəm İbrahimbəyov bəyan edib.

Source: Meydan tv


“Hakimiyyətə tam dəstək verməyə hazıram”

“Ramiz Mehdiyev və Əli Həsənov kimi adamların işdən çıxarılması sözsüz ki, müsbət addımdır və bunu ancaq alqışlamaq olar”.

Bunu “Turan” İnformasiya Agentliyinə müsahibəsində dramaturq, Azərbaycan kinematoqrafçılar İttifaqının sədri Rüstəm İbrahimbəyov deyib.

Onun sözlərinə görə, bu şəxsləri çoxdan istefaya göndərmək lazım idi, çünki hazırki rəsmi ideologiyanın bir çox neqativ tərəfləri onların fəaliyyətinin nəticəsidir.

“İdeoloji cəbhədə böhran, telekanal və KİV-lərin aşağı səviyyəsi, plüralizmin və müstəqil mövqenin olmaması bu iki nəfərin fəaliyyətinin nəticələrindəndir. Mədəniyyət sahəsində, teatr, kino, musiqidə də vəziyyət yaxşı deyil. İnanıram ki, Mehdiyev-Həsənov tandeminin sıradan çıxarılmasına səbəb məhz budur”, – Rüstəm İbrahimbəyov deyib.

Onun fikrincə, baş verənlər optimistliyə şərait yaradır. Rüstəm İbrahimbəyov hesab edir ki, bu cür köhnə kadrların getməsi və əzəvinə savadlı gənc kadrların cəlb edilməsi vəziyyəti sağlamlaşdıracaq.

“Mən bu addımları tam dəstəkləyirəm və əgər ehtiyac duyularsa hakimiyyətə bu məsələdə tam dəstək verməyə hazıram”, – Rüstəm İbrahimbəyov bəyan edib.

Ramiz Mehdiyev 1995-ci ildən prezident administrasiyasının rəhbəri, Əli Həsənov da həmin ildən administrasiyada ictimai-siyasi şöbənin rəhbəri olub. Müstəqil ekspertlər adıçəkilən şöbənin ölkədə KİV və telekanalların böyük əksəriyyətinin nəzarətə götürdüyü və kurasiya etdyini bildirirdilər və bunu Ramiz Mehdiyevlə Əli Həsənovun adı ilə bağlayırdılar. Bundan başqa ekspertlər fərqli düşünən insanların təhqir edilməsini, “trollar ordusunun” yaradılmasını da bu şəxslərlə əlaqələndirirlər.

Rəsmi məlumata görə, Ramiz Mehdiyev oktyabr ayında öz xahişi ilə tutduğu vəzifədən azad edilib. Bundan sonra o, Milli Elmlər Akademiyasının prezidenti seçilib.

Əli Həsənov prezident İlham Əliyevin sərəncamı ilə noyabrın 29-da tutduğu vəzifədən azad edilib.

Ana səhifəSiyasətRüstəm İbrahimbəyov Ramiz Mehdiyev və Əli Həsənovun işdən çıxarılmalarını alqışladı