Hakim partiyanın deputatları qışqırıq və fit sədaları altında zala daxil olublar
“Jamnews”un materialı
Gürcüstan parlamentində “xarici agentlər haqqında” qanun layihəsinin müzakirəsindən əvvəl media, qeyri-hökumət və vətəndaş sektorunun nümayəndələri parlamentdə etiraz aksiyası keçiriblər. Onlar həm parlament binasının girişində, həm də binanın özündə, komitələr zalının girişində “Rusiya qanunu”na etiraz ediblər.
Qanunun hər iki variantının müzakirəsi Xarici əlaqələr və müdafiə komitələrinin birgə iclasında başlayır və artıq məlum olduğu kimi, qanun layihəsi parlamentin iclasında birinci oxunuşda qəbul olunacaq, sonra baxılması üçün Venesiya Komissiyasına göndəriləcək.
Hakim “Gürcü arzusu” Partiyasının deputatları qışqırıq və fit sədaları altında zala daxil olublar.
Etirazçılar bildirirlər ki, bu qanun Gürcüstanı Avropadan uzaqlaşdıracaq və onun Aİ-yə namizəd statusu almasına mane olacaq.
“Düz bir il əvvəl bu zalda hakim partiya dövlət müfəttişliyini ləğv etdi, bu gün isə qeyri-dövlət sektorunu, medianı ləğv etməyə, onların işinə müdaxilə etməyə çalışdığını görürük. Buraya ona görə gəldim ki, bu ölkənin vətəndaşı kimi baş verənlər məni çox incidir, mən Avropa İttifaqına doğru irəliləyən ölkədə yaşamaq istəyirəm”, – deyə keçmiş dövlət müfəttişi Londa Toloraya bildirib.
“Gürcüstan naminə Lelo” Partiyasının üzvü Salome Samadaşvilinin fikrincə, bu qanun layihələrinin komitədə baxılması “səssiz keçə bilər”.
“Bizim vəzifəmiz görüşün baş tutmasının qarşısını almaqdır. Amma bu o demək deyil ki, Rusiya işğalçı rejimi komitənin məxfi iclasını, məsələn, axşam saatlarında çağırmayacaq. Onlar bu qanun layihəsini imzalamaq üçün asanlıqla komitə iclasını keçirə bilərlər, lakin indi bizim vəzifəmiz iclasın keçirilməsinə mane olmaqdır”, – Samadaşvili deyir.
Gürcüstan hökumətinin qəbul etmək istədiyi bu qanuna görə, xaricdən maliyyələşən qeyri-hökumət və media qurumları “xarici təsir agentləri” kimi qeydiyyatdan keçməli olacaqlar.
Parlamentdə iki qanun layihəsi qeydiyyata alınıb, biri fevralın 14-də, o, Rusiyadakı qanunun tam oxşarıdır. Amma bu qanun ciddi tənqid olunduqdan sonra ikinci layihə alternativ olaraq qeydiyyata götürülüb. Bu qanun, müəlliflərinin dediyinə görə, Amerika qanununa (FARA) bənzəyir, onlar layihənin FARA-nın hərfi tərcüməsi olduğunu bildirirlər.
Hər iki qanun layihəsinin müəllifləri rəsmi olaraq hakim komandadan ayrılan deputatların yaratdığı “Xalqın Gücü” Hərəkatıdır. “Xalqın gücü” sərt anti-Qərb bəyanatları ilə tanınır. Üstəlik, hərəkat üzvləri “Gürcüstanı müharibəyə sürükləməyə çalışan Qərb haqqında həqiqətləri insanlara çatdırmaq” üçün yaradıldığını açıq şəkildə bildirirlər.
Qanun layihəsi hakim partiyadan başqa hamı tərəfindən tənqid olunur: yerli media, qeyri-hökumət sektoru, müxalifət, ekspertlər, “Gürcü arzusu”nun yaxınlarda hakimiyyətdə olan siyasətçiləri, hətta Gürcüstan prezidenti tərəfindən də.
Qanun layihəsi müxtəlif beynəlxalq təşkilatlar, Gürcüstanın qərb tərəfdaşları, amerikalı senatorlar və avropalı deputatlar tərəfindən kəskin tənqid olunur. Amerika səfiri bunu açıq şəkildə “Rusiya qanunu” adlandırıb.
