Partiya ikinci dəfə təsis qurultayı keçirib
ReAl Partiyasının avqustun 4-də təsis qurultayı keçirilib. Tədbir videokonfrans formatında baş tutub.
5 saata yaxın davam edən və 93 nəfərin iştirak etdiyi qurultay Siyasi Komitəni və Nəzarət Təftiş Komissiyasını seçib.
Bu barədə Meydan TV-yə danışan Siyasi Komitə üzvü Natiq Cəfərli bildirib ki, o da daxil olmaqla quruma 6 nəfər üzv seçilib:
“İlqar Məmmədov, Rəsul Cəfərov, Zaur Qurbanlı, Mahmud Mahmudov və Erkin Qədirli”.
Natiq Cəfərli gələcəkdə Siyasi Komitə üzvlərinin sayının artırıla biləcəyini və Nizamnamədə bunun əksini tapdığını söyləyib:
“Çox güman ki, yaxın zamanlarda komitə əvvəllər partiyaya üzv olan və ya olmayan insanlarla genişləndiriləcək. Eyni zamanda, Siyasi Komitə partiyanın idarəetmə işini öz üzərinə götürəcək”.
Natiq Cəfərli NTK-nin 5 nəfərdən ibarət təşkil edildiyini, amma qurum üzvlərinin daimi olmayacağını, rotasiya qaydasında 3 aydan bir yenilənəcəyini bildirib.
O deyib ki, partiya məclisinin funksiyasını yerli məclis sədrlərinin toplantısı yerinə yetirəcək. Məclis 3 aydan bir toplanacaq və Siyasi Komitə onların qarşısında hesabat verəcək.
Natiq Cəfərli partiya sədrinin Siyasi Komitə tərəfindən seçiləcəyini bildirib:
“Sədrin səlahiyyətləri xeyli azaldılıb. Buna səbəb kollegial idarəetməni genişləndirməkdir. Siyasi Komitə istənilən an sədri istefaya göndərmək səlahiyyətinə malikdir”.
Respublikaçı Alternativ Partiyası (REAL) 2009-cu ilin yanvar ayında Respublikaçı Alternativ Hərəkatı kimi təsis edilib. 2009-cu ildə Konstitusiyaya dəyişikliklərlə bağlı keçirilən referendumda “bir şəxsin iki dəfədən artıq prezident seçilə bilməsi” maddəsinə etiraz olaraq hərəkat elan olunub.
2013-cü ildə hərəkatın sədri İlqar Məmmədov İsmayıllıda təşkil olunan mitinqlərə qatılmaq cəhdinə görə həbs olunub və 7 il azadlıqdan məhrum edilib. 2018-ci ilin yayında İlqar Məmmədov şərti azadlığa buraxıldı. Sonradan Ali Məhkəmə ona bəraət verdi.
2018-ci ilin aprelində Real Alternativ Hərəkatı I təsis Qurultayını keçirdi və Real Partiyasının yaradıldığı elan edildi. Bundan sonra sənədlər Ədliyyə Nazirliyinə təqdim olunmadığından, partiya ikinci dəfə təsis qurultayı keçirib.
