”Həyət evləri, həyətyanı sahələr su ilə dolub”
Qrunt sularının səviyyəsinin qalxması Binəqədidə həyətləri su altında qoyub.
Məlumatı APA-ya Ekologiya və Təbii Sərvətlər Nazirliyinin (ETSN) Milli Geoloji Kəşfiyyat Xidmətinin geoloji planlama ekspedisiyasının dəstə rəisi Rafiq Həsənov verib. Bildirib ki, subasma “White Palace” şadlıq sarayının arxasındakı sahədə baş verib:
“Həyət evləri, həyətyanı sahələr su ilə dolub. Bəzi yerlərdə xırda gölməçələr əmələ gəlib”.
Rafiq Həəsnov bildirib ki, subasma hadisəsi son aylar əraziyə düşən atmosfer yağıntılarının təsirindən baş verib:
“Qrunt sularının səviyyəsinin qalxması ilə bərabər, atmosfer yağıntıları da toplanıb. Nəticəsi də göz önündədir”, – deyə R. Həsənov qeyd edib.
Son illər Bakının Binəqədi rayonunda yağıntılardan sonra evləri və həyətlər tez-tez su basir. Bu, rayonda normadan artıq məskunlaşma və kanalizasiya sisteminin lazımı səviyyədə işləməməsi ilə də izah edilir.
