Kavkazski uzel-in materialı
Xankəndidə Karen Avanesyanla bağlı insident quramadır, şəhərdə yaxşı tanınan, psixi xəstə olan kişi heç vaxt aqressiya göstərməyib. Bu insident təbliğat üçün istifadə oluna bilər, deyə hüquq müdafiəçiləri bildiriblər.
Kavkazskiy uzel-in yazdığına görə, Xankəndidə erməni əsilli sakin Karen Avanesyan şəhərdə keçirilən tədbir yerinə keçməyə cəhd etsə də, polis onun qarşısını alıb. Azərbaycan Daxili İşlər Nazirliyinin məlumatına görə, o, onlara qumbara atıb, atəş açıb, yaralanıb və saxlanılıb.
Keçmiş “dövlət naziri” Artak Beqlaryan bildirib ki, Qarabağ ermənilərinin köçündən sonra bölgədə 40 nəfərdən çox sakin qalmayıb, qalanların arasında etnik ermənilər də olub. Bundan əvvəl, 2023-cü il oktyabrın 2-də BMT missiyası Qarabağda 50-dən 100-ə qədər etnik erməninin qaldığını bəyan etmişdi. BMT-nin bu rəqəmləri göstərən bəyanatının orijinalı Kavkazskiy uzel-də dərc olunub. 2024-cü ilin sentyabr ayının əvvəlinə olan məlumata görə, bölgədə yalnız 14 erməni qalmışdı. Qarabağdakı son erməni sakinlərindən biri, 70 yaşlı Vera Ağasyan isə oktyabrın sonunda vəfat edib.
“Qarabağda 13 erməni qalıb, onların çoxu yaşlı və ya psixoloji problemləri olan insanlardır”, – Kavkazskiy uzel-in müxbirinə “Qarabağ Ombudsmanı”nın ofisindən bildiriblər.
“Bizim bu insanların vəziyyəti ilə bağlı dəqiq məlumatımız yoxdur. Çünki bütün məlumatları yalnız etibar doğurmayan Azərbaycan mənbələrindən izləyirik, Karen Avanesyanla insidentin baş verib-vermədiyini və hər şeyin həqiqətən də Azərbaycan tərəfinin təqdim etdiyi kimi olub-olmadığını deyə bilmərik. Bizim məlumatımıza görə, köçdən sonra Stepanakertdə (ermənilər Xankəndini belə adlandırırlar – red.) qalan bütün ermənilər Azərbaycan polisinin daimi nəzarəti altındadırlar və sərbəst hərəkət etmək hüququndan məhrumdurlar. Əgər Stepanakertdə [Xankəndi] Azərbaycan hakimiyyəti hansısa tədbir hazırlayırsa, erməniləri bir yerə toplayıb nəzarət altında saxlayırlar”, – deyə “Qarabağ Ombudsmanı” Qeqam Stepanyan bildirib və əlavə edib ki, “ona görə də qəribədir ki, İlham Əliyev Stepanakertdə [Xankəndi] klinikanın açılışında iştirak edəndə Karen Avanesyan şəhərdə sərbəst gəzə bilib”.
Stepanyan qeyd edib ki, “bu hadisədən yalnız bir nəticə çıxarmaq olar – Azərbaycan hakimiyyətinin ermənilərə qarşı təbliğatı davam edir, məqsəd isə dəyişməzdir – beynəlxalq ictimaiyyəti inandırmaq ki, Qarabağ erməniləri təhlükəlidirlər və hətta qocalar, uşaqlar, qadınlar və psixi xəstələr belə terrorçu və separatçıdırlar”.
Stepanyan əlavə edib ki, ofisinin əməkdaşları Karen Avanesyanı tanıyan insanlarla danışıb. “Hər biri əmindir ki, Avanesyan belə bir hərəkət edə bilməzdi. Mən bu hekayəni etibarsız hesab edirəm və bunun ermənifobiya təbliğatını dəstəkləmək üçün qurama olduğunu düşünürəm. Azərbaycanda dəqiq məlumat verə biləcək beynəlxalq humanitar təşkilatlar yoxdur. Ermənistanın rəsmi hakimiyyəti də susur. Hazırda biz Karen Avanesyanın vəziyyəti və harada olması barədə heç nə bilmirik”, – deyə Stepanyan bildirib.
İctimai xadim, “Qarabağın sabiq ombudsmanı” Artak Beqlaryan isə “Karen Avanesyanla bağlı hadisənin şübhəsiz ki, qurama akt olduğunu” bəyan edib. “Azərbaycan hakimiyyətinə hakimiyyəti saxlamaq üçün əsas mexanizm olan antierməni təbliğatının yeni dalğasını başlatmaq üçün belə bir hekayə lazımdır”, – Beqlaryan bildirib.
Karen Avanesyan 58 yaşındadır, heç vaxt qanunla problemi olmayıb, psixi xəstə kimi qeydiyyatda idi və Stepanakert [Xankəndi] PPX əməkdaşları onu sakit vətəndaş kimi tanıyırdılar, – Kavkazskiy uzel-in müxbirinə “Qarabağ DİN” nümayəndəsi bildirib. Onun sözlərinə görə, “Karen Albertoviç Avanesyan, 1967-ci il təvəllüdlü, Stepanakertdə [Xankəndi] tək yaşayırdı, “DQR” vətəndaşı idi, Ermənistanda Avanesyanın qohumları tapılmayıb”.
Stepanakertdən [Xankəndi] olan qaçqın Laura Avaqyan Azərbaycan güc strukturlarının versiyasına şübhə ilə yanaşıb. “Bir kadr var ki, o gedir, sonra isə üzü örtülü halda yerdə uzanıb, ətrafında isə polis əməkdaşlarıdır. Bəs avtomat hanı, hücumun videosu hanı? Mən inanmıram. Onlar bunu edirlər ki, desinlər siz diversantsınız və heç vaxt vətəninizə qayıtmayacaqsınız”, – deyə qadın bildirib.
“Şəhərdə hər kəs Karenlə tanış idi, çünki o, daim küçələrdə gəzirdi, sahibsiz pişikləri yemləyirdi, heç vaxt aqressiya göstərməyib. O, belə hərəkətlər edə bilməzdi, çünki o, dinc sakin, psixi xəstə idi. Dərc edilən video isə yalnız onun gəzdiyini göstərir. Maraqlıdır ki, kamera xüsusi olaraq onu izləyir, amma o, çantasından nə çıxarırdı, ümumiyyətlə atışma və qumbara atma görüntüləri nədənsə yoxdur. Məncə, ondan istifadə ediblər”, – Stepanakertdən [Xankəndi] Artur Xaçatryan Kavkazskiy uzel-in müxbirinə bildirib.
Stepanakertdən [Xankəndi] olan Qrayr Qriqoryan da hesab edir ki, “Azərbaycan hakimiyyəti Qarabağ ermənilərinin qayıtmaq barədə düşünməməsi və beynəlxalq ictimaiyyətin erməniləri dəstəkləməməsi üçün hər şeyi edir”.
“Yaxınlarda eşitdim ki, Qarabağ ermənilərinə heç olmasa turist kimi Qarabağa gedib yaxınlarının məzarlarını ziyarət etmək təklifi olub. İstisna etmirəm ki, Karen Avanesyanla bağlı hekayə bu təklifin dəstək qazanmasının qarşısını almaq üçün qurulub. Və əlbəttə ki, ermənilər qayıtmaq hüququ barədə düşünməsinlər deyə”, – deyə Qriqoryan bildirib.
