Rusiya prezidenti hərbi planların dəyişmədiyini deyib
Rusiya Prezidenti Vladimir Putin Ukraynada xüsusi hərbi əməliyyat (SVO) planına düzəliş etməyi istisna edib.
Rusiya başçısı bu barədə Səmərqənddə jurnalistlərə müsahibəsində deyib.
“Hazırkı plan düzəlişlərə məruz qalmır. Baş Qərargah əməliyyat zamanı operativ qərarlar qəbul edir, nəyisə əsas məqsəd hesab edir və əsas məqsəd bütün Donbass ərazisinin azad edilməsidir”.
Onun sözlərinə görə, Ukrayna Silahlı Qüvvələrinin (AFU) əks-hücum cəhdlərinə baxmayaraq, Donbasın azad edilməsi üzrə işlər davam edir.
V.Putin hücum əməliyyatlarının davam etdiyini, onların “yavaş templə” getdiyini, Rusiya ordusunun yeni əraziləri işğal etdiyini vurğulayıb.
Xatırlatma
Rusiya Prezidenti Vladimir Putin Ukraynanın şərqindəki separatçı qurumları tanıdığını bəyan etdikdən 2 gün sonra, fevralın 24-də Ukraynaya qarşı müharibəyə başlayıb.
Dünyanın əksər ölkəsi Rusiyanın hücumunu pisləyib. Bundan sonra Avropa Birliyi ölkələri, eləcə də ABŞ Rusiyaya qarşı sanksiyalar tətbiq edib. 600-dən çox rusiyalı oliqarx, yüksək rütbəli hərbçilər, şirkət sahibləri, biznesmenlərlə yanaşı, Rusiya Prezidenti Vladimir Putin və xarici işlər naziri Sergey Lavrov sanksiyalara məruz qalıblar. Rusiyada təşkil olunacaq yarışlar təxirə salınıb, bu ölkənin adı mühüm tədbirlərdən və təşkilatlardan çıxarılıb.
Aprelin 7-də isə BMT Baş Assambleyası Rusiyanın təşkilatın İnsan Hüquqları Şurasından çıxarılması ilə bağlı qətnamə qəbul edib. Rusiya isə Avropa Şurası üzvlüyündən çıxıb.
Rusiya ordusunun Buça və digər Ukrayna şəhərlərində kütləvi qətliamlar və müharibə cinayətləri törətdiyi iddia olunur.
İyunun 25-də Avropa İttifaqının 12 ölkəsi Rusiya qazının tədarükündən tamamilə və ya qismən imtina edib.
