“Hara gedirəm səsimi eşitmirlər”
Fevralın 20-də İmişli rayonunun Mirili kənd sakini Məhrubə Babaşovaya məxsus ev yanıb. Bu barədə Meydan TV-yə M.Babaşovanın qonşuları məlumat veriblər. Hadisənin elektrik qısaqapanması nəticəsində baş verdiyi bildirilir. Yanğın 3 otaq və zaldan ibarət evi yararsız hala salıb.
Qonşularının sözlərinə görə, onsuz da imkansız olan ailə artıq evini də itirib.
6 uşaq anası olan M.Babaşovanın yeganə oğlu xəstəlikdən əziyyət çəkir. İki il öncə qadın media vasitəsilə prezidentə müraciət edərək ondan kömək istəmişdi. O, ötən əsrin 60-cı illərində tikilən evinin 2010-cu ildə çay daşqınları zamanı həftələrlə suyun içərisində qaldığını və bu üzdən də yararsız hala düşdüyünü deyirdi.
Heç kimin kömək etmədiyini söyləyən M.Babaşova oğlunun və özünün aldığı pensiyanın ümidinə qaldıqlarını söyləyirdi:
“Gücüm çatmır oğlumu həkimə aparım. Evim də uçur. Hara gedirəm səsimi eşitmirlər, mənə heç kim baxmır. Mehriban xanımdan, İlham Əliyevdən xahiş edirəm, mənim evimin tikilməsinə kömək etsinlər”.
