Prezident gömrüklə bağlı vacib fərman imzaladı

Prezident İlham Əliyev “Gömrük sahəsində nəzarətin həyata keçirilməsi ilə əlaqədar bəzi yoxlamaların sadələşdirilməsi haqqında” 2015-ci il 22 oktyabr tarixli 656 nömrəli fərmanında dəyişiklik edilməsi barədə fərman imzalayıb.

“Gömrük sahəsində nəzarətin həyata keçirilməsi ilə əlaqədar bəzi yoxlamaların sadələşdirilməsi haqqında” Azərbaycan Respublikası Prezidentinin 2015-ci il 22 oktyabr tarixli 656 nömrəli Fərmanının 1-ci hissəsi ləğv edilib.

Gömrük sahəsində nəzarətin həyata keçirilməsi ilə əlaqədar bəzi yoxlamaların sadələşdirilməsi haqqında Azərbaycan Respublikası Prezidentinin Fərmanının 1-ci hissəsi belə idi:

“Azərbaycan Respublikası Konstitusiyasının 109-cu maddəsinin 32-ci bəndini “Fiziki şəxslər tərəfindən Azərbaycan Respublikasının gömrük ərazisinə gətirilən və istehsal, yaxud kommersiya məqsədləri üçün nəzərdə tutulmayan ümumi gömrük dəyəri 10000 ABŞ dolları ekvivalenti məbləğindən (müşayiət edilən hər bir yetkinlik yaşına çatmamış fiziki şəxsə görə əlavə 2000 ABŞ dolları ekvivalenti məbləğindən) artıq olmayan mallar (aksizli mallar, avtonəqliyyat vasitələri və səfər zamanı fiziki şəxsin zəruri ehtiyaclarının ödənilməsi üçün nəzərdə tutulan əşyalar istisna olmaqla) gömrük ödənişi ödənilmədən gömrük sərhədindən keçirilir”.

İlk fərman imzalandıqdan sonra iqtisadçı Natiq Cəfərli onun işləyəcəyinə şübhə ilə yanaşmışdı. O, bunu belə əsaslandırmışdı: “Bu qərarın başqa tərəfləri də var: 1) Ölkədə ticarət dövriyyəsi azalıb, dükanlar bağlanır, əgər bu qərar həyata keçsə, qızına cehiz, evinə mebel, texnika alan heç kim Bakıdan almayacaq, qonşu ölkələrdən gətirəcək ki, bu da yerli ticarətçiləri daha da ağır duruma salacaq, obyektlər daha tez bağlanacaq, işsizlik daha da artacaq, 2) Ölkədə valyuta qıtlığı var, manat “üzə bilməyəcək”, dəyərdən düşəcək, bu qərar isə ölkədən valyuta axınını daha da güclendirəcək”.

Natiq Cəfərli həmin fərmanın ləğvinə də öz Facebook səhifəsində münasibət bildirib: “Bu gün həmin qərarı ləğv etdilər, daha cəmi 1000 dollarlıq mal gətirmək mümkün olacaq. Amma “qəhrəman” gömrükçülərimiz bu qərara da əhəmiyyət verməyəcəklər, vətəndaşın gətirdiyi 5 kq yağı, əti, kartofu belə yenə əlindən alacaqlar. Çünki sistem belə qurulub, oyun qaydaları belədir, heç kim də bu qaydaları dəyişmək istəmir, səbəbi: Siyasi loyallığın itirilmə qorxusudur, bu ölkədə iqtidarın ideologiyası olmadığı üçün bütün loyallıq sxemləri korrupsiya üzərində qurulub. Sistem dəyişməlidir”.