“Yüksək səviyyəli əlaqələrdən öncə işgüzar müzakirələr aparılmalıdır”
Ermənistan Türkiyə ilə əlaqələrə hazır olduğunu bildirib.
Bu barədə Ermənistanın Baş nazirinin mətbuat katibi Mane Gevorqyan Türkiyə prezidenti Rəcəb Tayyib Ərdoğanın bəyanatını şərh edərkən danışıb.
Məlumatı “Armenpress”yayıb.
Mane Gevorqyan bildirib ki, Baş nazir qanunverici orqanın son iclasında hökumət üzvlərilə sual-cavab zamanı Türkiyə ilə danışıqlar mövsuna toxunub: “Paşinyanın fikrincə, yüksək səviyyəli əlaqələrdən öncə işgüzar müzakirələr aparılmalıdır. Hazırda Ermənistan və Türkiyə rəsmiləri arasında hər hansı əlaqə olmayıb, amma Ermənistan hökuməti bu cür əlaqələrə hazırdır. Bu cür effektiv iş şəraitində Ermənistan həm yüksək, həm də ali səviyyədə görüşlərə hazır olacaq”.
Mətbuat katibi Ərdoğanın Ermənistan ərazisindən dəhlizin açılması çağırışı ilə bağlı suala belə cavab verib: “Ermənistan 9 noyabr və 11 yanvar tarixli bəyanatlarda yer alan razılaşmaların dəqiq yerinə yetirilməsinə böyük əhəmiyyət verir. Kommunikasiyaların açılması regionda uzunmüddətli sülh və sabitliyin bərqərar olması, düşmənçilik mühitinin aradan qaldırılması üçün son dərəcə vacibdir və Ermənistan bu istiqamətdə hərəkət etmək əzmindədir. Bəzi bəyanatlarda kommunikasiyaların bərpası mövzusu transformasiya olunur və regional təcridin saxlanması məntiqini qazanır. Dəhlizlər barədə söhbət regionda sülhün və sabitliyin bərqərarı, düşmənçilik atmosferinin aradan qaldırılması məntiqinə ziddir. O təkcə region dövlətlərinin və xalqların təcrid olunmasına yox, həm də bu təcridə dönməzlik əlamətinin verilməsinə yönəlib. Lakin regionun qarşılıqlı əlaqəsini qabardan regional kommunikasiyaların açılması yolları da var və düşmənçiliyin tədricən aradan qaldırılmasının real yolu ola bilər. Ermənistan hökuməti bu variantı dəstəkləyir və 9 noyabr tarixli üçtərəfli bəyanatın 9-cu bəndində və 11 yanvar tarixli üçtərəfli bəyanatda məhz bu variant təsvir olunub”.
Türkiyə hökuməti Ermənistanla sərhədlərini 1993-cü ilin aprelində Azərbaycanın Kəlbəcər rayonu işğal ediləndən sonra bağlayıb.