Akopyanın rəhbərlik etdiyi fondun təşəbbüsü kimi irəli sürülən tədbirlərin büdcədən maliyyələşdirilməsi faktı narazılıq yaradıb
Ermənistan hakimiyyəti Baş nazir Nikol Paşinyanın həyat yoldaşı Anna Akopyanın əsasını qoyduğu “Öyrənmək dəbdədir” təhsil kampaniyasının büdcə pulları hesabına maliyyələşdirildiyini üzə çıxarıb. Bu təşəbbüsü tənqidçilər seçkiqabağı strategiyanın bir hissəsi hesab edirlər.
“OC Media” yazır ki, “Öyrənmək dəbdədir” 2024-cü ilin noyabrında başlayan eyni adlı hərəkatın bir hissəsi kimi Akopyan tərəfindən yaradılan Ted Talks-u təqlid edən çıxışlar silsiləsidir. Çıxışlar bu ilin mart ayından Akopyanın “Mənim Addımım” Fondu tərəfindən aparılır və Paşinyan tez-tez ölkə üzrə tədbirlərdə qonaq kimi çıxış edir.
Ötən cümə günü Baş nazirin aparat rəhbəri Arayik Arutyunyan kampaniyanın dövlət büdcəsindən maliyyələşdiyini açıqlayıb və əlavə edib ki, bu, Paşinyan üçün “prioritet proqram”dır.
Arutyunyan proqrama nə qədər vəsait ayrıldığı barədə ətraflı məlumat verməyib.
“Azadlıq” radiosu xəbər verir ki, hakimiyyət onlara yalnız Paşinyanın iştirakı ilə keçirilən tədbirlərin Baş nazirin dəftərxanası tərəfindən maliyyələşdirildiyini bildirib. Onlar əlavə ediblər ki, Paşinyan “bu kampaniyanın demək olar ki, bütün əsas görüşlərində, bəzən hətta iş saatlarında da iştirak edib, çıxışlar edib və sualları cavablandırıb”.
Akopyanın rəhbərlik etdiyi fondun təşəbbüsü kimi irəli sürülən tədbirlərin büdcədən maliyyələşdirilməsi faktı hökumət nəzarətçiləri arasında narazılıq yaradıb, bəziləri bunu seçkiqabağı strategiya kimi qiymətləndirib.
“Azadlıq” radiosunun məlumatına görə, söhbətlərin auditoriyası əsasən müəllimlərdən ibarət olub. Tamaşaçılar danışıqlarda iştirak etmək üçün qeydiyyatdan keçməlidirlər və onların telefonları və digər videoçəkiliş aparatlarının tədbir zamanı toplandığı bildirilir.
“Əslində bunlar öz şəxsi reytinqlərinin, siyasi qüvvələrinin və partiyalarının xeyrinə maskalanmış seçkiqabağı görüşlər və kampaniyalardır, hamısı bizim vergilərimiz və büdcəmiz hesabına maliyyələşir”, – deyə hökumət tənqidçisi və köşə yazarı Qor Madoyan “Facebook”da yazıb və əlavə edib ki, dövlət büdcəsi “hamımıza açıq şəkildə xidmət etməlidir, qapalı formatda və məhdud ictimai görüşlər vasitəsilə yox”.
Madoyan maliyyələşdirmənin qanuni olub-olmadığını da sorğulayıb.
Ötən şənbə günü, kampaniyanın maliyyə mənbələri açıqlanandan bir gün sonra Ermənistan parlamentinin spikeri Alen Simonyan ölkədə növbəti parlament seçkilərinin 2026-cı il iyunun 7-də keçiriləcəyini açıqlayıb.
“Geri sayım başladı…”, – deyə, Simonyan “Telegram”da yazıb.
Bundan əvvəl Paşinyan açıqlamışdı ki, onun və Akopyanın aparıcılıq etdiyi və 2024-cü ilin sonunda yayımlanan “Ailə podkast”nı hökumət üçün işləyən ekipaj hazırlayıb və lentə alıb:
“Ailə podkast”ı olsa da, bu, həm də Baş nazirin fəaliyyətinin bir hissəsidir. Mənim səfərlərimi, hökumət iclaslarını işıqlandıran eyni operatorlar podkastı çəkirlər, eyni şəkildə redaktə edirlər”.
Bu yazı ingilis dilindən tərcümə edilmişdir. Yazının əslini “OC Media”dan oxuya bilərsiniz.
