“Palyaçolar” Opera və Balet Teatrının səhnəsində

Kəndlilər çaşqınlıqla səhnəyə yüyürürlər.

Source: Specify Source


Tamaşada Gürcüstandan və Belarusdan gəlmiş aktyorlar iştirak edəcək

Opera və Balet Teatrının səhnəsində dünya şöhrətli bəstəkar Ruсero Leonkavallonun məşhur “Palyaçolar” (“Məzhəkəçilər”) ikipərdəli opera tamaşası oynanılacaq.

Noyabrın 17-də keçiriləcək tamaşada baş rolu – Kanio partiyasını Tbilisi Dövlət Opera və Balet Teatrının solisti, Gürcüstanın xalq artisti Teymuraz Ququşvili ifa edəcək.

Tonio partiyasında səhnəyə Belarus Milli Akademik Böyük Opera və Balet Teatrının solisti, Belarusun əməkdar artisti Stanislav Trifonov çıxacaq.

Tamaşada həmçinin Azərbaycanın əməkdar artistləri Afaq Abbasova (Nedda partiyası), Cahangir Qurbanov (Silvio partiyası), Əliəhməd İbrahimov (Arlekin partiyası) və Tural Ağasıyev (Kəndli partiyası) çıxış edəcəklər.

Tamaşanın dirijoru Yakopo Sipari di Peskasserolidir.

Yakopo Sipari di Peskasseroli Makedoniya Dövlət Opera və Balet Teatrının baş dirijorudur. O, eyni zamanda Qətər Simfonik Orkestri, İstanbul Milli Simfonik Orkestri, Belqrad Milli Teatrı Orkestri və Meksika Simfonik Orkestrinin dəvətilə bir çox opera tamaşasına dirijorluq edir.

Maestro bundan öncə də Opera və Balet Teatrının səhnəsində müxtəlif vaxtlarda Cakomo Puççininin “Madam Batterflay” və “Toska” operalarının dirijoru olub.


“Çıxış etmək vaxtıdır! Qiyafələri geyinmək vaxtıdır!”

“Palyaçolar” operasının ilk premyerası 1892-ci il mayın 21-də Milanda Arturo Toskanininin dirijorluğu ilə olub. Operanın “Çıxış etmək vaxtıdır! Qiyafələri geyinmək vaxtıdır!” ariyası opera aləmində çox məşhurdur.

Ehtimal olunur ki, Ruсero Leonkavallo bu operanı Petro Maskaninin “Kənd namusu” operasından ilhamlanaraq yazıb. Çünki hər iki operanın məzmunu və musiqi həlli eynidir.

Bəstəkar isə iddia edirmiş ki, “Palyaçolar”ın süjeti onun uşaqlıq xatirələri ilə bağlıdır. Atası hakim olub, eynilə belə bir cinayət işini aparıb. Digər bir fikirə görə isə bəstəkar operanın süjetini 1887-ci ildə Parisdə yaşayan zaman Katyul Mendesin pyesi əsasında oynalınan tamaşadan götürüb.


Birinci pərdə…

Əhvalat İtaliyanın cənubunda baş verir. Montalto kəndinə gələn küçə artistlərini yerli camaat sevinclə qarşılayır.

Truppanın rəhbəri Kanio və onun arvadı Nedda furqonda, təlxəklər Tonio və Beppo isə piyada yol gedirlər. Kanio kəndlilərə elan edir ki, axşam maraqlı tamaşa olacaq, arzu edənlər gəlib baxa bilərlər.

Bu vaxt Tonio Neddaya furqondan düşməyə kömək etmək istəyir. Bunu görən Kanio isə onu geri itələyir və arvadının əlində tutub aşağı endirir.

Kənd əhli mütrübləri tamaşadan öncə içki məclisinə dəvət edirlər. Beppe və Kanio məmnuniyyətlə razılaşırlar, Tonio isə getmək istəmir. Kəndlilərdən biri qəfil kobud zarafat edir. Deyir ki, yəqin Tonio Neddanı ərinin əlindən almaq istəyir. Kanio bu zarafata əvvəlcə gülsə də, sonradan pərt olur, qaşqabağını sallayır. Ona gülə bilərlər, amma səhnədə. Kanio üçün səhnədə məsxərəyə qoyulmaq, gülüş obyektinə çevrilmək başqadır. Səhnə ilə həyatı qarışdırmaq olmaz. O, arvadına tamah salanı bağışlamaz. Təlxək Tonio həqiqətən də Neddaya dəlicəsinə aşiqdir, lakin bunu özündən başqa heç kim bilmir.

Nəhayət, küçə artistləri kənd camaatı ilə birgə meyxanəyə yola düşürlər. Tonio elə bu zaman fürsətdən istifadə edib, Neddaya ürəyini açır, onu dəlicəsinə sevdiyini deyir. Nedda isə cavabında gülərək, onu ələ salır. Hətta ona yaxınlaşmaq istəyən Tonionu əlindəki qamçıyla vuraraq, ondan xoşlanmadığını göstərir.

Amma yanına gələn Silvio adlı gənc bir kəndlini nəvazişli öpüşlərə qərq edir. Tonio bunu görür, hətta Neddanın həmin kəndliyə ərini sevmədiyini, onun qısqanclığından cana doyduğunu dediyini eşidir. Tonio bundan bərk qəzəblənir, qisas almaq üçün eşitdiklərini Kanioya çatdırır.

Kanio da Neddanın məşuquna dediyi “Bu gecə mən həmişəlik sənin olacağam”, – sözlərini öz qulaqları ilə eşidir. O, Silvionun üzərinə atılır, lakin kəndli oğlan aradan çıxaraq qaçır və Kanio onun kim olduğunu görə bilmir.

image_from_ios.jpg
Səhnədə Tonio görünür

Hadisədən bərk qəzəblənən Kanio əlində bıçaq, arvadını ölümlə hədələyir və sevgilisinin kimliyini ondan soruşur. Bu zaman Beppo cəld bıçağı onun əlindən alır. Nedda isə özünü furqonun içərisinə atır.

Artıq tamaşaya az qalır, geyinmək vaxtıdır. Kanio tək dayanıb, ümidsizlik içərisindədir, səhnəyə çıxıb oynamaq lazımdır.


İkinci pərdə…

Truba və barabanın müşayiəti ilə izləyiciləri tamaşaya baxmağa səsləyirlər. Səhnə, tamaşa başlayır.

Palyaço – Kanio, Kolombina-onun arvadı Neddadır. Beppo Kolombinanın məşuqu Arlekini oynayır. Tonio isə nökərdir.

Kolombina məşuqunu gözləyir. Evə yaxınlaşan Arlekin onun üçün sevgi nəğməsi oxuyur. Kolombina onu pəncərədən evə buraxır, onlar gecə birgə qaçmağa qərar verirlər.

Evə gələn ər arvadının “Bu gecə mən həmişəlik sənin olacağam”, – sözlərini eşidir. O sözləri ki, Nedda bir müddət əvvəl Silvioya pıçıldamışdı. Kanio özünü zorla sakitləşdirməyə çalşır. Amma bu anda səhnədə farsla, həqiqi faciə bir-birinə qarışır. Kanio artıq Palyaço rolunu oynamır. O, arvadından sevgilisinin kimliyini israrla söyləməyi tələb edir.

Nedda isə acizanə şəkildə gedişatı oyuna, tamaşaya, yönləndirməyə çalışır. O, səhnədə oynamağa, zarafat etməkdə davam etsə də, qorxusundan tir-tir əsir.

Kanionun gözlərindən qəzəb, nifrət yağır, o, Neddanın önünü kəsərək, ona bıçaq zərbəsi endirir. Ölümcül yaralanan Nedda sevgilisini səsləyir. Kəndli Silvio oturduğu yerdən səhnəyə atılır ki, Neddanı xilas etsin. Gözü qan çanağına dönən ər onu da öldürür.

Kəndlilər çaşqınlıqla səhnəyə yüyürürlər. Qanlı əməlindən sarsılan Kanionun əlindəki bıçaq barmaqlarında sürüşərək yerə düşür.

Səhnədə Tonio görünür, o, elan edir, “Komediya bitdi…”

Ana səhifəMədəniyyət“Palyaçolar” Opera və Balet Teatrının səhnəsində