“Süründürməçiliyə yol verilməsinə və digər nöqsanlara görə 68 ədliyyə işçisi intizam məsuliyyətinə cəlb edilib”
Martın 6-da Milli Məclisin plenar iclasında Azərbaycanın İnsan Hüquqları üzrə Müvəkkili (Ombudsman) Elmira Süleymanova 2014-cü il üzrə hesabatla çıxış edib.
ANS PRESS-in məlumatına görə, Elmira Süleymanova bildirib ki, fəaliyyəti dövründə onun ünvanına ümumilikdə 114 min 690, 2014-cü ildə isə 13 min 150 müraciət daxil olub. Həmin müraciətlərin 74.2 faizi şikayətlərdən, 25.8 faizi isə ərizələrdən ibarət olub.
Ombudsman deyib ki, 2014-cü ildə aparatda və regional mərkəzlərdə ümumilikdən 2468 şəxs ilkin olaraq qəbul edilib. 388 şəxs isə əvvəllər təqdim etdikləri müraciətlərlə bağlı aparatda qəbul olunub, onlara müvafiq məsləhət və izahat verilib.
Cəzaçəkmə müəssisələrində, həbsxanalarda, istintaq təcridxanalarında, müvəqqəti saxlama yerlərində, hərbi hissələrdə, uşaq, ahıl və əlil evlərində, internatlarda baxışlar zamanı 3547 şəxs qəbul edilib. Ombudsmanın sözlərinə görə, şikayətlərin Müvəkkilin səlahiyyətlərinə aid olmaması halları nəzərə alınaraq onların 51 faizinə baxılmaqdan imtina edilib.
“Yerdə qalan şikayətlərin 49 faizi baxılmaq üçün icraata qəbul edilib, bunların 56.8 faizi təmin olunub. Bundan başqa, Ermənistan tərəfindən atəşkəsin müntəzən şəkildə pozulması nəticəsində yaralanaraq əsir düşmüş və ya girov götürülmüş vətəndaşlarımızın, o cümlədən, əsgərlərin azad olunması və onların qaytarılması ilə bağlı dəfələrlə Beynəlxalq Qızıl Xaç Komitəsinə edilib. Müvəkkilin vəsatəti ilə fəaliyyəti dövründə 455 məhkum əfv edilib və ya barəsində amnistiya aktı tərtib edilərək azadlığa buraxılıb”,-deyə Elmira Süleymanova hesabatında bildirib.
Elmira Süleymanova bildirib ki, vətəndaşların hüquq və mənafelərinin pozulmasına, o cümlədən onların müraciətlərinə qayğılı və həssas yanaşılmamasına, süründürməçiliyə yol verilməsinə və digər nöqsanlara görə 68 ədliyyə işçisi intizam məsuliyyətinə cəlb edilib.
Ombudsman qeyd edib ki, onlardan 8-i ədliyyə orqanlarından xaric edilib, eləcə də 2 nəfərin əməlinə hüquqi qiymət verilməsi üçün materiallar prokurorluq orqanına göndərilib, 22-si tutduğu vəzifədən azad olunub, 12-nə tutduğu vəzifəyə tam uyğun olmaması barədə xəbərdarlıq edilib, 14-nə şiddətli töhmət, 10-na töhmət və 2-nə irad tutulub.
“Ötən il məhkəmə qərarlarının icrası ilə bağlı daxil olan 704 müraciətin təhlili onu deməyə əsas verir ki, məhkəmə qərarlarının icrasının bir çox hallarda əsassız olaraq yubadılması, süründürməçilik hallarına yol verilməsi, vətəndaşların incidilməsi, hüquqazidd hərəkət və nöqsanlar ədalət mühakiməsinin səmərəliliyinə mənfi təsir göstərməklə yanaşı, vətəndaşların konstitusiya ilə müəyyən edilən hüquq və azadlıqlarının məhkəmə təminatı hüququnu pozur.
Ümumiyyətlə, bəzi məhkəmə icraçılarının öz vəzifələrinin icrasına qeyri-peşəkar və laqeyd münasibəti nəticəsində bir sıra məhkəmə qərarları icra edilməyib və ya uzun müddət icrasız qalıb. Bu da məhkəmə qərarına müvafiq olaraq tələbkar qismində çıxış edən vətəndaşların hüquqlarının pozulması ilə nəticələnib”.
Həmçinin alimentin ödənilməsi tələbinə dair məhkəmə qərarlarının icra edilməməsi ilə bağlı 248 müraciət daxil olub. Alimentin borclu tərəfindən vaxtaşırı ödənilməməsi və ya ödənişdən boyun qaçırması, yaxud da ödənişin yubadılması üzrə şikayətlər daha çox olub.
Sənəddə qeyd olunub ki, boşanmaların sayının artması, belə anaların əksər hissəsinin işləməyən, himayəsində azyaşlı uşaqlar olan və yeganə təminat vasitəsi kimi alimentə daha çox ehtiyacı olan evdar qadınlar olduğunu, habelə alimentin borclu tərəfindən ödənilməsi ilə bağlı çoxsaylı problemləri nəzərə alaraq “Aliment Fondu”nun yaradılması (alimentin sonradan borcludan məcburi qaydada alınması şərti ilə müvafiq dövlət qurumu tərəfindən ödənilməsi mexanizminin hazırlanıb tətbiq edilməsi) zəruridir.
Həmçinin müvəqqəti saxlama yerlərində (MSY) intizam qaydalarını pozduğuna görə 77 polis əməkdaşı cəzalandırılıb. Onlardan 8 nəfəri daxili işlər orqanlarından xaric edilib, 2-si isə tutduğu vəzifəsindən azad edilib. 67 nəfər barəsində digər inrizam tədbirləri görülüb.
2014-cü il ərzində müvəqqəti saxlama yerlərində 237, istintaq təcridxanalarında və cəzaçəkmə müəssələrində 1030, bundan əlavə oalraq şəxslərin təkidi və müraciəti əsasında isə 250-dək saxlanılan şəxslərlə görüş keçirilib. MSY-də nöqsanlara yol verdiyinə görə ,Nizami RPİ və Sumqayıt ŞPİ MYS-lərinin rəisləri, Sumqayıt ŞPİ-nin 1-ci və 3-cü polis bölməsinin, Sabunçu RPİ-nin 14-cü RB-nin, Kürdəmir RPİ, Samux RPİ-nin məsul şəxslərinə xəbərdarlıq edilib və töhmət verilib.
