Sosial şəbəkələrdə oliqarx balalarının Binə hava limanı şosesində avtomobil ötüşdürmə yarışına çıxmasını əks etdirən görüntülər yayılıb. Yarış zamanı idman avtomobilləri seriyasından olan “Nissan GTR R35 AMS700 ALPHA”, “Corvette Z06 Tuned” və “Cadilac CTS-V Hennessey” olduğu aşkar görünür.
Yarış zamanı maşınlardan birinin spidometri göstərir ki, avtomobillər saatda 250 km sürətlə hərəkət edirlər. Bu isə yol hərəkəti qaydalarının kobud şəkildə pozulması deməkdir.
Qeyd edək ki, Bakıda bu cür yarışların keçirilməsini təşkil edən “PP-Performance” şirkətidir. Bu şirkət əsasən Almaniyada bahalı və yarış avtomobillərini ölkəyə idxal edir. Bu şirkətin Bakıdakı distribütorunun sahibi isə nəqliyyat naziri Ziya Məmmədovun qardaşı, millət vəkili Elton Məmmədovun 26 yaşlı oğlu Aynar Məmmədovdur.
PP-Performance.de
saytında bu barədə məlumat qeyd olunub. Aşağıdakı screenshot buna əyani sübutdur.
Məsələ ilə bağlı day.az saytına Bakı şəhər Baş Dövlət Yol Polisi İdarəsi İctimaiyyətlə əlaqələr şöbəsinin rəisi Vaqif Əsədov münasibət bildirib. O deyib ki, bu videonu görməyib: “Ancaq deyə bilərəm ki, aeroport şosesində icazə verilən maksimal sürət həddi 120 km/saatdır. Əgər sürücülərdən hansısa sürət həddini aşırsa, sözsüz ki, yol hərəkəti qaydalarının pozulmasıdır. Əgər maşınların nömrələri görünürsə, sürücülərə qarşı müvafiq tədbirlər görüləcək”.
Respublika Dövlət Yol Polisi İdarəsi İctimaiyyətlə əlaqələr şöbəsinin rəisi Kamran Əliyev isə deyib ki, aeroport yolunda avtomatik rejimdə işləyən radarlar quraşdırılıb: “Yollarda hətta radarların olduğu barədə nişan da quraşdırılıb. Sürət həddi aşıldıqda, sürücülər inzibati məsuliyyətə cəlb olunacaqlar”.
Xatırladaq ki, hələ keçən il İlham Əliyev qudurğan oliqarx-məmur balaları ilə əlaqədar ən sərt çıxışlar etmişdi. Buna baxmayaraq elə keçən il məmur övladlarının törətdiyi avtomobil qəzaları saytımızdakı infoqrafikada yer almışdı:
