Əmək və əhalinin sosial müdafiəsi naziri Səlim Müslümov “Günəşli” yatağında baş verən partlayışı “təbii fəlakət” adlandırıb. Baş verənlərdə bağlı Əmək Müfəttişliyinin Təhqiqat Komissiyasının yaradılacağını bildirib. APA-nın xəbərinə görə nazir platformada olan bütün işçilərin xilasedici jiletlərinin əyinlərində olduğunu, işçilərin təxliyəsində qayıqlardan istifadə olunduğunu deyib: “ Proses əməyin təhlükəsizliyinə uyğun qaydada həyata keçirilib. Lakin orda güclü külək olub, yanğın olub və güclü dalğa nəticəsində qayıqlardan birinin qarmağı açılıb. Təhqiqatdan sonra bunun başvermə səbəbi dəqiq məlum olacaq və əməyin təhlükəsizliyi ilə bağlı bütün məsələlər araşdırılacaq”.
S. Müslümov bildirib ki, hadisədə zərər çəkənlərlə bağlı aparılan ilkin yoxlama nəticəsində məlum olub ki, çalışanların hamısı sığorta şirkətində sığortalanıblar: “Onların əmək müqavilələri var. Bu o deməkdir ki, əgər onların hər hansı birində istehsalat zədəsinin qalıqları qalarsa, əmək qabiliyyətinin itirilməsi faizi müəyyənləşəcək və buna uyğun onlara sığorta şirkəti tərəfindən böyük məbləğdə sığorta haqqı ödənəcək. Həyatını itirənlərin də ailələrinə sığorta şirkəti tərəfindən böyük məbləğdə sığorta haqqı ödəniləcək. Bu, mövcud qanunvericilikdə nəzərdə tutulub. Onların aylıq maaşının məbləğinə, ailə üzvlərinin sayına və digər meyarlara uyğun olaraq pul ödənəcək”.
Mövcud qanunvericiliyə görə bütün müalicə xərclərini də sığorta şirkəti ödəməlidir. Cənab prezidentin də sərəncamında bu barədə məsələ var və hər hansı problem olmayacaq”
