Polis maşınını çəkicləyən oğlanın anası danışdı
Bir neçə gün öncə Bakıda yol polisi avtomobilini çəkiclə zədələyən 42 yaşlı Şahin Mail oğlu Bəylərovun anası Raya Bəylərova Meydan TV-yə danışıb. Deyib ki, oğlunun günahını danmır, amma onun şərlənməsini də qəbul etmir.
Bəylərovlar Bakının Montin qəsəbəsi, Daş karxanası deyilən ərazidəki gecəqondularda, adsız, nömrəsiz ünvanlardan birində yaşayırlar. Şahin Bəylərov çoxuşaqlı ailənin ilk övladıdır.
Normal istiliyi olmayan, alaqaranlıq, 1 televizordan və masadan ibarət nəmişlik otaqda Ş.Bəylərovun anası ailəsinin, övladının həyat hekayəsini danışır və ümid edir ki, onun səsini eşidən tapılacaq: “Prezidentə, daxili işlər nazirinə müraciət edirəm. Mənim oğlumun narkotiklə əlaqəsi yoxdur. Dövlətin əmlakına vurulan ziyanın cəzasını versinlər. Biz istəmərik ki, dövlətə ziyan dəysin. Amma narkotiklə mənim oğlumun əlaqəsi yoxdur. Məni bir ana kimi qəbul edib dinləsinlər”.
“Polis işçisi də söyüş söyüb”
Raya Bəylərova deyir ki, oğlu polis işçisinin ona söyüş söyməsindən sonra əsəbiləşib və belə bir hadisə meydana çıxıb: “Yol polisinin əməkdaşları vətəndaşla çox kobud davranır. Sumqayıta bacımgilə gedəndə dəfələrlə bunun şahidi olmuşam. Sürücülərlə çox kobud davranırlar. Mənim oğlum nə istəyib? Soruşub ki, axtarışda olan maşınla bağlı yeni bir məlumat var? Polis işçisi də söyüş söyüb”.
“Məcbur qalıb 1 gündə 3 dəfə 102 xidmətinə zəng edəndən sonra…”
Raya Bəylərovanın sözlərinə görə, həyat yoldaşının əmisi oğlu 2008-ci ildə Şahinin adına bankdan kreditlə maşın götürüb: “Bu haqda mən 2010-cu ildə Nərimanov Rayon Məhkəmə icraçılarından evə məktub gələndən sonra bilmişəm. İcraçıların yanına gedib bunun nə məsələ olduğunu soruşdum. Dedilər, Şahinin adına maşın götürülüb, pulu ödənməyib. Bununla bağlı Respublika Prokurorluğuna, Daxili İşlər Nazirliyinə getmişəm, heç bir tədbir görməyiblər. Məcbur qalıb 1 gündə 3 dəfə 102 xidmətinə zəng edəndən sonra işi 18-ci polis bölməsinə verdilər. Şahini də tutub aparıb 1 gün saxladılar.
İşi bir polis işçisi araşdırdı, axırda da dedi ki, bu iş bizlik deyil. Bəs kimlikdir? Şahin də həmin gün yol polisinə yaxınlaşıb həmin maşınla bağlı soruşub. Ona söyüşlə cavab veriblər. Belə başa düşürəm ki, Şahin o hadisəni eləyib ki, bəlkə dərdinə şərik olan, bu məsələni araşdıran tapılar”.
“Bu məsələni araşdıran yoxdur”
R.Bəylərova düşünür ki, oğlu DYP maşınını zədələməklə üzləşdikləri qanunsuzluqlara diqqət cəlb etmək istəyib: “Bizə o maşınla bağlı Nərimanovun məhkəmə icraçılarından, bankın icraçılarından çoxlu məktublar gəlib. Həmin məktubları aparıb yoldaşımın əmisi uşaqlarına vermişəm. Üstəlik, o biri oğlumun adına da yoldaşımın digər əmisi oğlu Azad Saday oğlu Bəylərov da bankdan kredit alıb, ödəməyib. Buna görə də evə məktublar gəlir. Bu məsələni araşdıran yoxdur”.
“Oğlum əvvəllər məhkum olunubsa, ona qarşı narkotik ittihamı irəli sürməlidir?”
R.Bəylərova oğlunun vaxtilə həbsdə olduğunu təsdiqləyir. Deyir ki, bir əxlaqsız qadını vurub və buna görə 9 il həbs cəzasına məhkum edilib. Lakin vaxtından əvvəl həbsdən azad olunub: “Oğlum əvvəllər məhkum olunubsa, ona qarşı narkotik ittihamı irəli sürməlidir? 9 övladım var, Şahin böyük oğlumdur. Övladlarımdan 7-sini təkbaşına evləndirmişəm. Həyat yoldaşım Mail Bəylərov “Bakxolodelnik”də işləyirdi. 1995-ci il oktyabrın 11-də işə getdi və qayıtmadı. Həmin günlərdə Şahin hospitalda sarılıq xəstəliyinə görə yatırdı. Vəziyyəti çox ağır idi. Hərbi hissədə elə bilmişdilər ki, öləcək, onu oradan qeydiyyatdan da çıxarmışdılar. Halbuki oğlumu əsgərliyə mən özüm könüllü göndərmişdim. Yoldaşımı 10 gün axtardıq, oktyabrın 21-də polisə gedib axtarışa verdik. Şəkillərini telekanallara verdik, tapılmadı ki, tapılmadı. Xoşqədəmin verlişinə 3 il getmişəm ki, bəlkə tapılar. Yoldaşım itəndən sonra uşaqları özüm dolandırmışam. Xırda ticarətlə məşğul olmuşam, çirkli yun alıb, yuyub, didib, yorğan salmışam, heyvanın baş-ayaqlarını alıb, ütüb satmışam, 9 uşağı böyütmüşəm. Bu gün də evimizdə 1 çörək olanda bölüşüb, yeyib keçinirik. 2004-cü ildən bu yana banklara kreditim var. Gedib yoxlasınlar.
Mənim oğlum dövlətə heç vaxt ziyan vermək istəməz. Uşaqlarımın heç birinin narkotiklə əlaqəsi olmayıb, ola da bilməz. Şahin idmançıdır. Çıxıb məhlədən qarşınza çıxan hər bir kəsdən bunu soruşa bilərsiniz. Bütün məhlə uşaqlarını idmana o həvəsləndirib. Günü məşqdə, idmanda keçib. O, qonaqlıqda, toyda içki içərdi. Narkotik heç vaxt mənim oğlumun ola bilməz”.
“Əgər narkotik var idisə, niyə həmin gün demədilər?”
R.Bəylərova deyir ki, hazırda yaşadıqları ünvana Laçından köçüblər. Yoldaşı Bərdə rayonundan olub, lakin sonradan Laçının Əhmədli kəndinə köçüblər: “Evimizi, şəraitimizi görürsüz. Buralar həmişə nəmişlik olur. Burada yaşaya-yaşaya uşalarıma birtərhər ev düzəldib ayırmışam. Şahin 2004-cü ildə ailə həyatı qurdu. Kondisioner ustasıdır. 2 övladı var. Ailəsini dolandırmaq üçün əlindən gələni edir. Yay mövsümündə 3 ay “Elit”də kondisioner ustası kimi işləyir. Qalan aylarda da evlərdə kondisioner quraşdırır, elektrik xətləri çəkir. Hadisədən 1 gün əvvəl qardaşı ilə “AZİ”-də kondisioner söküblər ki, təmir etsinlər. Həmin günü də məşqə, oradan da çıxıb AZİ-yə getməli idi. Orada yolda polisdən maşınla bağlı soruşub, o da söyüb və bu hadisə baş verib”.
Ş.Bəylərovun anası deyir ki, oğlunun həbsi haqda telkanallardan xəbər alıb: “Biz bu haqda xəbərlərdən eşitdik. Atam rəhmətə gedib, biz orada idik. Dedilər ki, belə bir iş olub, Şahini 18-ci polis bölməsinə aparıblar. Mən də ora getdim, Şahinlə görüşmək istədim. Dedilər ki, Şahini aparırıq içkili olub-olmamasını yoxlamağa. Onunla danışmağa da qoymadılar. Elə orada da dedilər ki, polisdən yaxınlaşıb söz soruşub, söyüş olub və bu hadisə baş verib. Şahin o hadisəni eləyib ki, bəlkə dərdinə şərik olar, bu məsələləri araşdıran tapılar. Onu da basdılar içəri. Növbəti gün günortadan sonra dedilər ki, guya Şahində narkotik tapıblar. Bu yalandır. Mənim oğlum idmançıdır. Polis maşınına ziyan vurubsa, buna görə cəza versinlər. Əgər narkotik var idisə, niyə həmin gün demədilər?”
“Narkotiklə məşğul olanın anasının evi bu gündə olur?”
Raya Bəylərova ölkə başçısının, daxili işlər nazirinin baş verənlərdən xəbərsiz olduğunu düşünür: “İlham Əliyevin, Ramil Usubovun polisin vətəndaşla kobud danışmasından xəbəri yoxdur. Xəbərləri olsaydı, belə hallar olmazdı.
Mən uşaqlarımı atasız min bir zülmlə böyütmüşəm. Onların narkotiklə əlaqəsi ola bilməz. Narkotiklə məşğul olanın anasının evi bu gündə olur? İndi bu nədir, onun üstünə narkotik qoyurlar. Ramil Usubova bir ana kimi müraciət edirəm. Oğlum maşını sındırıb, amma narkotiki üstünə qoymasınlar. Nə olsun, yetimdir, yetimin də Allahı var, bunu unutmasınlar. Mən yun yuyub didməklə ailəmi saxlayıram. Narkotik satan oğlanın anası heyvan başını ütüb satır? 2 aydır banka kredit borcumu ödəyə də bilmirəm. Mənim oğlumun şikayətinə illərdir baxmırlar. Amma oğlumun torpağını alanda o qədər polis gəldi ki, bəlkə o qədər polislə getsəydilər, rayonlardan birini alardılar”.
“Maşına ziyan vurub və bunun cəzasını versinlər”
R.Bəylərovanın sözlərinə görə hazırda “İnci” firmasının hasarladığı ərazidə torpaq sahələri olub. Həmin torpaq polislərin gücünə əllərindən alınıb: “O torpaqda vaqonumuz vardı. Kran gətirib vaqonu Şahin içində ola-ola götürüb kənara atdılar. Həmin vaxt mən Şahinə dedim ki, danışma. Bizə qarşı haqsızlıq oldusa da, susduq.
Mənim oğlum maşına ziyan vurub və bunun cəzasını versinlər. Narkotiki isə yığışdırsınlar. Polis işləyirsə, itkin yoldaşımı tapıb versin, oğlumun adına alınan maşını tapıb banka qaytarsın, torpağımızı alıb özümüzə versin. Maşını oğlumun adına alan xaricdə deyil ki, onu tapa bilmirlər. Lökbatanda yaşayırlar, gedib tapsınlar, maşını alsınlar”.
Ş.Bəylərovun anası deyir ki, oğluna vəkil tutmağa imkanları yoxdur, dövlətin verdiyi vəkildən də onun özü imtina edib: “Mənim istədiyim budur ki, heç olmasa indi bizi qəbul edib dinləsinlər, problemimizi həll eləsinlər. Şahin heç vaxt narkotikə əl uzatmayıb. Bunu da bilsinlər. Oğlum əsəbi olub, müalicəsini alırdı. Ona resept yazmışdılar, dərman alıb içirdi. Bu hadisələr də ona pis təsir edirdi”.
Şərq idman növləri ilə məşğul olan Ş.Bəylərov fevralın 21-də Heydər Əliyev prospektindəki Heydər Əliyev adına kompleksin yanında DYP əməkdaşına yaxınlaşaraq ondan söz soruşub və bundan sonra aralarında yaranmış mübahisə zəminində polis maşınına özündə olan çəkiclə zərbələr vurub, maşında quraşdırılan avadanlıqları əzib. Şahin Bəylərovun üstündə çəkic gəzdirməsinə gəlincə, məlum olub ki, o, məşqlərdə müəyyən fəndləri yerinə yetirmək üçün bu alətdən istifadə edirmiş. Rəsmi məlumatlara görə, maşının əzilməsi səbəbindən DYP-yə 30 min manat ziyan dəyib. Ş.Bəylərova Cinayət Məcəlləsinin 221-ci – xuliqanlıq, 234-cü – narkotik maddələrin qanunsuz dövriyyəsi və 186-cı – əmlakı qəsdən məhv etmə maddələri ilə ittiham elan olunub. Ş.Bəylərovun barəsində Nərimanov rayon Məhkəməsinin qərarı ilə 4 ay müddətinə həbs-qətimkan tədbiri seçilib.
