Sentyabrın 2-də reportyor Cavid Abdullayev Baş Prokurorluğun Ağır Cinayətlərə dair İstintaq İdarəsinə çağrılıb. Onu müstəntiq Ramiz Alverdiyev dindirib. Bu haqda jurnalistin özü məlumat verib: “Mənə bildirdilər ki, “Mingəçevir işi” ilə əlaqədar çağırıblar. Ancaq suallar əsasən Meydan TV-nin fəaliyyəti ilə bağlı oldu. Neçə il işlədiyimi, Meydan TV-nin ofisinin bağlanmasından sonra kiminlə işlədiyimi, kimlərin işlədiyini soruşdular”.
Meydan TV-nin fəaliyyəti ilə bağlı sualları cavablandıran C.Abdullayev idarəyə səhər saat 10:40-da çağırılıb. Dindirmə 3 saat çəkib. C.Abdullayevlə yanaşı dindirilməyə müstəqil jurnalist Natiq Cavadlı da çağırılıb. Onun dindirməsi hələ yekunlaşmayıb. Meydan TV-də materialları yayımlanmış daha bir jurnalist İzolda Ağyeva isə günorta saat 15:00-da ifadə verəcək.
