Ermənistan tərəf də yaralının olduğunu deyir
Azərbaycan Ordusunun hərbi qulluqçusu yaralanıb.
Azərbaycan Müdafiə Nazirliyinin yaydığı
məlumat
da belə deyilir.
Bildirilir ki, hadisə iyulun 6-da saat 17:50-də olub:
“Rusiya sülhməramlılarının müvəqqəti yerləşdirildiyi Azərbaycan ərazisindəki qanunsuz erməni silahlı dəstələri tərəfindən Azərbaycan Ordusunun Ağdam rayonunun Əliağalı kəndi istiqamətində yerləşən bölmələri atəşə tutulub” .
Məlumatda daha sonra deyilir ki, atəş nəticəsində yol təkmilləşdirmə işlərinə cəlb olunan Azərbaycanın hərbi qulluqçusu baş gizir Sakit Əhliman oğlu Dadaşov yaralanıb:
“Yaralıya ilkin tibbi yardım göstərilib və o, hərbi hospitala təxliyə olunub"
Nazirlik bildirir ki, baş verən insidentin araşdırılması üçün Rusiya sülhməramlı qüvvələrinin komandalığına və Türkiyə-Rusiya Birgə Monitorinq Mərkəzinə məlumat verilib.
Ermənistan tərəf isə Azərbaycanı Geğarkunik rayonu ərazisində atəşkəsi pozmaqda ittiham edir. Bu haqda “Armenpress” ölkənin Silahlı Qüvvələrinin təmsilçisi Samvel Asatryana istinadla xəbər paylaşıb.
Xəbərə görə, insidentin Verin Şorj sərhəd kəndi ərazisində baş verib:
“Ermənistan tərəfdən bir hərbçi yüngül yaralanıb. Bizdə olan məlumata görə, Azərbaycan tərəfdən iki yaralı var”, – Asatryan sözlərinə əlavə edib.
Noyabrın 10-dan, atəşkəs razılaşmasından bu yana Azərbaycan və Ermənistan tərəfləri daim bir-birlərini təxribat törətməkdə, sərhəd zolağını və atəşkəsi pozmaqda günahlandırır.
İyunun 11-də Azərbaycan tərəf məlumat yayaraq bildirdi ki, Ermənistan silahlı qüvvələri Azərbaycan bömələrinə Kəlbəcər istiqamətində atəş açıb. Müdafiə Nazirliyi baş vermiş hadisəyə görə bütün məsuliyyətin Ermənistan tərəfinin üzərinə düşdüyünü bildirib.
Ermənistan Müdafiə Nazirliyi də iyunun 10-da Azərbaycan silahlı qüvvələrinin sərhəd bölgəsində mühəndis işləri aparmaq istəməsi və erməni tərəfin işi dayandırmaqdan ötrü cavab addımına əl atması haqda məlumat yayıb.
Məlumatda deyilir ki, Azərbaycan tərəf Ermənistan mövqelərinə atəş açıb və onlar da adekvat cavab veriblər.
Mayın 12-də Ermənistan tərəf açıqlama verərək bildirilirdi ki, Azərbaycan silahlı qüvvələri onların sərhədlərini pozaraq bir neçə kilometr ərazilərinə daxil olub. Azərbaycan Ermənistanın bu iddiasını təkzib etmişdi.
Həmin zaman Ermənistan tərəf Azərbaycanı, Azərbaycan isə Ermənistanı atəşkəsi pozmaqda günahlandırmışdı. Hətta Ermənistan iki hərbi qulluqçusunun həlak olduğunu da açıqlamışdı. Azərbaycan isə silahdan istifadə etmədiyini, ümumiyyətlə, atəş açmadığını bildirmişdi.
Mayın 28-də isə Azərbaycan tərəf açıqlama yaymışdı ki, Ermənistanın açdığı atəş nəticəsində Naxçıvanda bir hərbi qulluqçu yaralanıb. Bu məlumatı isə Ermənistan Müdafiə Nazirliyi təkzib etmişdi.
İyunun 2-də Azərbaycan Müdafiə Nazirliyi və Dövlət Sərhəd Xidməti birgə məlumat yayıb. Həmin məlumatda bildirilirdi ki, 40-a yaxın erməni hərbçisi Kəlbəcərin Armudlu kəndi tərəfdən 400 metr Azərbaycan ərazisinə daxil olub: “Azərbaycan Respublikasının Silahlı Qüvvələrinin həyata keçirdiyi tədbirlər nəticəsində Ermənistan silahlı qüvvələri ərazidən çıxarılıb. Bu zaman silahdan istifadə edilməyib”.
Bir neçə saat sonra Ermənistan Müdafiə Nazirliyi "Azərbaycan tərəfi dezinformasiya yayır" deyərək məlumatı təkzib edib.
2020-ci il sentyabrın 27-də Azərbaycan və Ermənistan silahlı qüvvələrinin təmas xəttində ağır döyüşlər başlamışdı. Noyabrın 9-u, döyüşlərin dayandırılmasına qədər Azərbaycan tərəf 280 civarında kəndi, dörd qəsəbəni və beş şəhəri işğaldan azad etdiyini açıqlamışdı.
Noyabrın 10-da Azərbaycan, Ermənistan və Rusiya rəhbərlərinin adından atəşkəs bəyanatı yayıldı. Razılaşmaya əsasən, Kəlbəcər, Ağdam və Laçın rayonları da Azərbaycanın nəzarətinə qaytarıldı.
Laçın dəhlizində və qoşunların təmas xəttində isə Rusiya sülhməramlıları yerləşdirildi.
Beynəlxalq sənədlərdə Azərbaycanın tərkib hissəsi kimi tanınan keçmiş Dağlıq Qarabağ Muxtar Vilayətinin çox hissəsi isə Ermənistanın və Rusiya sülhməramlılarının nəzarətində qaldı.
Ermənistan Müdafiə nazirliyi Ermənistan-Azərbaycan dövlət sərhədinin Kəlbəcər rayonu istiqamətində yerləşən Azərbaycan silahlı qüvvələrinin bölmələrinə atəş açması barədə açıqlama yaymışdır.
