Bankın xarici və yerli valyutada uzunmüddətli depozit reytinqi qalxıb
“Moody’s” beynəlxalq reytinq agentliyi Azərbaycan Beynəlxalq Bankının (ABB) reytinqlərinə yenidən baxıb. Bəzi reytinqləri yüksəldib.
Xəbəri APA bankın mətbuat xidmətinə istinadən yayıb. Bildirilir ki, xarici və yerli valyutada uzunmüddətli depozit reytinqi “Caa2”-dən “Caa1” səviyyəsinə artırılıb. Xarici valyutada qorunmayan borclar reytinqi “Caa3” səviyyəsindən “Caa2”-yə qaldırılıb:
“Bankın kredit ödəmə qabiliyyətinin baza səviyyəsi (Baseline Credit Assessments – BCA) də “ca” pilləsindən “caa3” pilləsinə qədər yüksəlib. Eyni zamanda, qarşı tərəf kredit riski qiymətləndirməsi (CRA) “Caa1” (cr) səviyyəsindən “B3” səviyyəsinə yüksəlib”.
Məlumatda bildirilir ki, həmçinin bankın uzunmüddətli depozit reytinqinə pozitiv proqnoz verilib.
“Reytinqlərdəki müsbət dəyişikliklər restrukturizasiya prosesi başa çatandan sonra bankın maliyyə durumunun yaxşılaşacağı ilə bağlı “Moody’s”in gözləntilərini əks etdirir. Agentliyin proqnozlarına görə, öhdəliklərin restrukturizasiyası planının bu şəkildə icrası bankın maliyyə dayanıqlığını, kapital mövqeyini gücləndirəcək və aktivlərinin keyfiyyətini yaxşılaşdıracaq. Öhdəliklərin könüllü restrukturizasiyası ilə yanaşı, problemli aktivlərin bankın balansından çıxarılması da aktivlərinin keyfiyyətinin yaxşılaşmasına kömək göstərəcək”, – deyə məlumatda bildirilir.
“Moody’s” ekspertlərinin rəyinə görə, problemli aktivlərin transferi bu ilin sonuna qədər başa çatacaq. Nəticədə, bankın birinci dərəcəli kapitalının 13 faiz ətrafında olması ehtimal edilir. Agentlik bankın 2018-ci ili mənfəətlə başa vuracağını gözləyir. Mənfəətlilik səviyyəsi, ölkənin makroiqtisadi durumundan da asılı olacaq.
“Moody’s” Azərbaycan hökumətinin böyük ehtimalla banka dəstəyi davam etdirəcəyini gözləyir. Bu gözlənti bankın səhmlərinin 95 faizinin dövlətə məxsus olması, ABB-nin ölkənin ən böyük bankı olması və bank bazarındakı aktivlərin əhəmiyyətli hissəsini bölüşməsi kimi amillərlə əsaslandırılıb. Eyni zamanda, hökumətin bankda vəsait yerləşdirmiş əmanətçilərə və digər müştərilərə dəstək verdiyi xüsusi qeyd edilib. Belə ki, öhdəliklərin restrukturizasiyası prosesinin ABB-də depoziti olan müştərilərə heç bir təsiri olmayıb.
Rəydə o da göstərilib ki, restrukturizasiya planı başa çatdıqdan sonra “Moody’s” reytinqlərə yenidən baxacaq və gələcək durumuna uyğun olaraq bankın reytinqlərini yüksəldəcək.
Ancaq Moody’s” bankın Rusiyada fəaliyyət göstərən törəməsi “ABB-Moskva”nın yerli və xarici valyutada uzunmüddətli depozit reytinqlərini “B3 səviyyəsindən “B2”-dək endirib.
Bankın kredit ödəmə qabiliyyətinin baza səviyyəsi (Baseline Credit Assessments – BCA) “b3”-dən “b2”-yə endirilib. Eyni zamanda, qarşı tərəf kredit riski qiymətləndirməsi (CRA) “B1” (cr) səviyyəsindən “B1” (cr) səviyyəsinə enib.
Bununla yanaşı, “Moody’s” “ABB-Moskva”nın qısamüddətli depozit reytinqini “Not Prime” səviyyəsində təsdiqləyib.
“ABB-Moskva” 2002-ci ilin yanvarında təsis olunub. 2004-cü ildən etibarən bank Rusiyanın Əmanətlərin Sığortalanması Sisteminə daxil olunub. Hazırda bankın səhmlərinin 100 faizi ABB-yə məxsusdur.
