Metyu Miller: “ABŞ Qubad İbadoğlunun həbsini yaxından izləyir”

ABŞ Dövlət Departamenti, oceanfishing/Shutterstock

Dövlət Departamentinin sözçüsü Birləşmiş Ştatların insan hüquqlarına və əsas azadlıqlara hörmətin artırılmasına qətiyyətlə sadiq qaldığını vurğulayıb

ABŞ Azərbaycan Demokratiya və Rifah Partiyasının (ADR) sədri, iqtisadçı Qubad İbadoğlunun həbsini yaxından izlədiyini bildirib.

Bu barədə iyulun 25-də Dövlət Departamentinin sözçüsü Metyu Miller “Turan”ın müxbirinin suallarını cavablandırarkən danışıb.

Metyu Miller Birləşmiş Ştatların insan hüquqlarına və əsas azadlıqlara hörmətin artırılmasına qətiyyətlə sadiq qaldığını vurğulayıb.

O, Azərbaycan hakimiyyətinə çağırış edib:

“Biz Azərbaycanı öz vətəndaşlarının, o cümlədən, Qubad İbadoğlunun Azərbaycanın konstitusiyasına və beynəlxalq öhdəliklərinə uyğun olaraq insan hüquqlarını və əsas azadlıqlarını qorumağa çağırırıq”.

Metyu Miller. Foto: Twitter

İyulun 23-də saxlanılan iqtisadçı Qubad İbadoğlu haqda Nərimanov Rayon Məhkəməsi bir gün sonra 3 ay 26 gün qətimkan tədbiri seçib.

Qubad İbadoğluya qarşı Cinayət Məcəlləsinin 204.3.1 (saxta pul və ya qiymətli kağızlar hazırlama, əldə etmə və ya satma – mütəşəkkil dəstə tərəfindən törədildikdə) maddəsilə ittiham irəli sürülüb.

Vəkil Zibeydə Sadıqova ittihamın əsassız olduğunu vurğulamaqla yanaşı, onun istintaq dövründə həbsdə saxlanmasına zərurət olmadığını söyləyib. Vəkil Nərimanov Rayon Məhkəməsinin qərarından apelyasiya şikayəti verəcək.

Adları bir gün əvvəl Türkiyə mediasında “FETÖ” (Fətullah Gülən Terror Örgütü) ilə əlaqəli şəxslər kimi təqdim olunan dörd nəfərə qarşı da Qubad İbadoğlu ilə eyni – Cinayət Məcəlləsinin 204.3.1 ( saxta pul və ya qiymətli kağızlar hazırlama, əldə etmə və ya satma mütəşəkkil dəstə tərəfindən törədildikdə) maddəsi ilə ittiham irəli sürülüb.

Sözügedən dörd nəfər Döyrüş Cəfərov, Gümrah Əbdürəhmanov, Ruslan Əliyev və Anar Əliyevdir. Onlar iyulun 23-də məhkəmə qarşısına çıxarılıb və hər biri barəsində ilkin istintaq dövrü üçün 4 aylıq həbs qətimkan tədbiri seçilib.

Qubad İbadoğlu saxlandıqdan sonra yayılan məlumatlarda iddia olunurdu ki, Anar Əliyev ifadəsində onun adını çəkib. Amma Qubad İbadoğlu ümumiyyətlə, bu şəxsi tanımadığını deyib.

Ana səhifəSiyasətMetyu Miller: “ABŞ Qubad İbadoğlunun həbsini yaxından izləyir”