Solmaz Qasımova

Mənbə: Foto: meydan tv

Başlıq: Solmaz Qasımova

Kürdəmir sakini: Bütün qəzalı evləri tikdilər, bizimkindən başqa

''İki dəfə icra başçısı dəyişib, bizim işimizə baxan yoxdur''

Kürdəmir sakini 63 yaşlı Solmaz Qasımova ona qarşı haqsızlıq edildiyini söyləyir. Deyir, illər öncə Kürdəmirdə zəlzələ olan zaman çatlamış, qəzalı şəraitə düşmüş evlərin hamısını dövlət təmir edib, yaxud yerində başqa ev tikib, təkcə onların evindən başqa:

“Özüm də təqaüdçü adamam. Evi də görürsünüz, bir balaca təkanda yerlə yeksan olacaq vəziyyətdədir. Evimi təmir etdirməyə və ya təzə ev tikməyə imkanım yoxdur. Faktiki bütün qəzalı evləri yenidən tikiblər, sıra mənə çatanda niyə ayrı-seçkilik ediblər? Mən də Azərbaycan vətəndaşıyam, istəyirəm hamıya edilən güzəştdən mən də faydalanım”.

S.Qasımova deyir ki, uzun müddətdir övladları ilə birgə bu qəzalı evdə yaşayır. Onların da evi əvvəlcə Kürdəmir Rayon İcra Hakimiyyətinin qəzalı evlər siyahısına düşüb:

“Yazmışdılar ki, tikiləcək. 2012-ci il idi. Kimi siyahıya almışdılarsa, hamısına ev tikib verdilər. Bizim pulumuz olmadı, azdan-çoxdan hörmət etmədik deyə, qaldı. Əvvəlcə dedilər, “tikəcəyik, arxayın olun”. İlbəil gözlədik, tikmədilər. Bakıya qədər adımız gedib çıxdı. Onun üstündə 2 dəfə icra başçısı dəyişib, bizim işimizə baxan yoxdur”.

Solmaz Qasımovanın evi

Solmaz Qasımovanın evi

Mənbə: meydan.tv

Solmaz Qasımova bu evə gəlin gəlib. Ev 1983-cü ildə çiy kərpicdən tikilib. Şəraitsizlik, divardakı çatlar ilk baxışdan diqqət çəkir:

“Şəraitsizliyi də, darısqallığı da qəbulumdur. Mən razı, amma təbii fəlakətə dəcavabdeh deyiləm axı. Zəlzələ evimi qəzalı hala salıb. İndi bu evdə yaşamaq təhlükəlidir. Həyat yoldaşımı da çox tez itirmişəm, cavan ölüb. Uşaqları böyük çətinliklə, təkbaşıma böyütmüşəm. İndi nə onların normal bir işi var, nə də mənim. Ev tikmək isə asan iş deyil”.

S.Qasımova deyir ki, əgər hər il evlərini yüngülvari təmir etməsəydilər, çoxdan uçub-tökülmüşdü:

“Biz hər il bu evə əl gəzdiririk. Etməsəydik, çoxdan uçmuşdu. Birtəhər saxlamışıq. Özü də cəmi bir balaca otaqdır. Heç hökumətdən də böyük nəsə istəmirəm. Elə bu boyda bir ev tikib versin, bəsimizdir. Zəlzələdə şkafımız da uçmuşdu, bütün qab-qacağımız cilik-cilik olmuşdu. İnanın, balı aşağı olsa da, zəlzələ tez-tez olur. Hər dəfə də ürəyimiz ağzımıza gəlir. 3 nəfərik, oğlum, qızım və mən. Çox vaxt qonşular zəlzələni heç hiss etmirlər, amma biz o dəqiqə bilirik, çünki ev silkələnir, qəzalıdır. Nəinki zəlzələ, külək əsəndə də ev tərpənir”.

mətbəx

mətbəx

Mənbə: meydan.tv

S.Qasımovanın aylıq qazancı yalnız 180 manatlıq pensiyasıdır. Dediyinə görə, bu, heç dərmanlarına çatmır:

“Gedib hardasa qab yuyub, yer süpürə də bilmirəm. Çünki böyrəyimin biri yoxdur, digərində də daş əmələ gəlib. Müalicə etdirə bilmirəm. İynənin biri 25-30 manatdır. Qızım boşanıb gəlib, oğlumun normal işi yoxdur, qaz bildirişi paylayır. Bilinmir hələ bu işdə davam edəcək, ya yox. Mən bilmirəm o pensiyanı yeməyə, içməyə, kommunala verim, yoxsa iynəyə-dərmana. Birtəhər dolanırıq”.

Onsuz da kiçik olan otağın tən ortasında dirək var. Ev sahibəsi deyir ki, bunu tavanın uçmaması üçün qoydurublar:

“Dəfələrlə icra hakimiyyətindən gəlib baxıblar. Heç nə edən yoxdur. Baxanlar da deyirlər ki, bəli, qəzalıdır. Rayonda evi bu vəziyyətdə olmayanlara ev tikildi, biz qaldıq. Nə deyim, görünür, nəsə umurmuşlar, verməmişik”.

ev

ev

Mənbə: meydan tv

Kürdəmir Rayon Fövqəladə Hallar Komissiyası isə vətəndaşın onlara deyil, mətbuata üz tutmasından narazı qalıb. Komissiyadan Meydan TV-yə deyiblər ki, vətəndaş evinin qəzalı olması ilə bağlı mətbuata yox, onlara müraciət etməlidir:

“Bizim əməkdaşlar onun evinə yerində baxış keçirib, vəziyyətini dəyərləndirərlər. Əgər ev həqiqətən qəzalı və yaşanası vəziyyətdə deyilsə, bu zaman Bakıya məlumat verilir, büdcə ayrılır və köməklik göstərilir. Bizə müraciət etməyibsə, biz necə kömək edə bilərik?”

Kürdəmir Rayon İcra Hakimiyyətindən isə vətəndaşların qəzalı evlərini bərpa etmək üçün büdcələrinin olmadığını söyləyiblər.

yataq otağı

yataq otağı

Mənbə: meydan.tv

Solmaz Qasımova

Solmaz Qasımova

Mənbə: Foto: meydan.tv

Buradaykən …

Sizdən kiçik bir xahişimiz var: Fəaliyyət göstərdiyimiz mühitdə məlumatlar dövlətin çox sıx nəzarəti altındadır. Meydan TV insanların keyfiyyətli və müstəqil informasiya ilə təmin etmək üçün çalışır. Biz sizin eşidə bilmədiyiniz, amma eşitmək istədiyinizə inandığımız hekayələri işıqlandırırıq. Dövlət senzurasının – rəsmi bloklanmanın və təzyiqlərin gücləndirilməsinə baxmayaraq, biz, müstəqil jurnalist komandası ağır şərtlər altında Azərbaycan xalqının dolğun, keyfiyyətli informasiya ilə təmin edilməsinə çalışırıq və bunun üçün sizin köməyiniz lazımdır.

Sizin dəstəyiniz bizim böyük risk altında işləyən jurnalistlərimizə güc verir. Azərbaycanda müstəqil jurnalistikanın qorunması üçün edilmiş hər bir cəhd sizin töhfənizdir. Çox sağ olun.

BIZƏ DƏSTƏK OLUN
Bölmələr:  
qısa linklər:   http://mtv.re/3ftr75

Ən çox baxılan