Müğənni 1 saatlıq konsertindən 1 milyon dollar qazanır
Məşhur müğənni Kristina Aqilera “Formula 1” Azərbaycan Qran Prisində iştirak etmək üçün Bakı gəlir. O, sıralanma turu başa çatdıqdan sonra axşam saatlarında avtoidman həvəskarlarının qarşısına çıxacaq.
Məlumatı
“Trend” Bakı Şəhər Halqası Əməliyyat Şirkətinə (BŞH) istinadən yayıb.
Bildirilir ki, ötən illərdəkindən fərqli olaraq bu il yarış həftəsonunun axşam saatlarında keçirilən əsas konsert proqramları Bakı Kristal Zalında baş tutacaq.
Bəstəkar və aktrisa kimi də tanınan müğənni K.Aqileranın 7 albomu bütün dünyada ümumilikdə 43 milyon dəfədən çox satılıb. O, indiyədək 6 “Grammy” mükafatına layiq görülüb və onun 4 mahnısı “Billboard”-ın ən çox dinlənən 100 ifası cədvəlində ilk sırada yer alıb.
Müğənnilik və bəstəkarlıq fəaliyyəti ilə yanaşı K.Aqilera müxtəlif film və seriallara çəkilib. O, həm də rol ifa etdiyi “Burlesque” filmində səsləndirilən “Bound to You” mahnısının bəstəkarlarından biri olub. Daha sonra bu mahnı “Golden Globe” nominasiyasına layiq görülüb. Bu il K.Aqilera “Warner Bros” tərəfindən çəkilən “Life of the Party” və çəkilişi müstəqil aparılan “Zoe” filmində yer alacaq. “Zoe” filmi bu il ilk dəfə “Tribeca” film festivalında nümayiş olunacaq.
Bundan başqa, K.Aqilera Ümumdünya Ərzaq Proqramında BMT-nin səfiri kmi fəaliyyət göstərməklə yanaşı bir sıra digər xeyriyyə işlərində də yer alır.
Bakı Şəhər Halqası Əməliyyat Şirkəti K.Aqileraya ödəniləcək qonorarın məbləğini açıqlamayıb. Dünyaca məşhur müğənnilərin gəlirləri barədə yazan “billboard.com” saytı isə
qeyd edir
ki, hələ 2011-ci ildə K.Aqilera 1 saatlıq konsert üçün 1 milyon dollar alırmış. Yəni xanımın dəqiqəsi 16 min dollaradır. Onun Bakıya gəlmək üçün də bu qədər qazanacağı güman edilir.
