”2 ilə XI sinif üzrə buraxılış imtahanları və kolleclərə qəbul yeni model üzrə aparılacaq”
2017-ci ildən 9 illik təhsil bazasında kolleclərə qəbul yeni qaydalar əsasında olacaq.
Dövlət İmtahan Mərkəzinin Direktorlar Şurasının sədri Məleykə Abbaszadə APA-ya deyib ki, yenilik bu il 9-cu sinif üzrə buraxılış imtahanlarına aiddir.
“Kolleclərə qəbul buraxılış imtahanlarının nəticələri əsasında aparıldığından 9 illik təhsil bazasında orta ixtisas müəssisələrinə qəbul qaydalarında da dəyişiklik edilib”. M. Abbaszadə dəyişikliyin səbəbini də açıqlayıb. Deyib ki, 9 il əvvəl ümumi təhsil müəssisələrində yeni tədris proqramları – kurrikulum tətbiq olunmağa başlayıb, həmin proqramlar əsasında təhsil alan şagirdlər bu il 9-cu sinfi bitirərək buraxılış imtahanı verəcəklər:
“Biliklərinin qiymətləndirilməsi də müvafiq qaydada aparılmalıdır. İmtahan ana dili və riyaziyyat fənləri üzrə 2 mərhələdə keçirilir və şagirdlərin biliyi 100 ballıq şkala ilə qiymətləndirilir. Abituriyentlər bu imtahandan topladıqları ballara uyğun kolleclərə qəbul olmaq üçün müsabiqədə iştirak edəcəklər. Bu barədə tədris ilinin əvvəlindən – sentyabr-oktyabrda ictimaiyyətə məlumat veririk. Gəncədə, Şirvanda, Şəkidə, Naxçıvanda, Lənkəranda, Ağcabədidə, Göyçayda, Xaçmazda və Bakıda bütün təhsil ictimaiyyətinin iştirakı ilə yeni qaydalara dair seminarlar keçirilib. V-IX siniflər üzrə bilik və bacarıqlar yoxlanılacaq alt standartlar, proqramlar, test tapşırığı nümunələri, qiymətləndirmə meyarları, cavab vərəqi nümunələri “Abituriyent” jurnalının xüsusi buraxılışında çap edilib. Ümumi orta təhsil bazasında yeni təhsil proqramları (kurrikulumları) üzrə buraxılış imtahanlarına hazırlaşanlar üçün Azərbaycan dili və riyaziyyat fənləri üzrə test tapşırığı nümunələri “Abituriyent” jurnalının xüsusi buraxılışları olan V-IX siniflər üzrə test kitablarında nəşr edilib”.
M. Abbaszadə qeyd edib ki, tam orta təhsil bazasında isə kolleclərə qəbul qaydalarında hər hansı dəyişiklik olmayıb. Şagirdlər ana dili, riyaziyyat və xarici dil fənləri üzrə buraxılış imtahanlarında topladıqları ballara (90 ballıq şkala) əsasən müsabiqədə iştirak edəcəklər:
“İki ildən sonra 11-ci sinif üzrə buraxılış imtahanları və 11 illik təhsil bazasında kolleclərə qəbul da yeni model üzrə – kurrikulum əsasında tərtib olunmuş test tapşırıqları əsasında aparılacaq”.
