Bank son 6 aylıq maliyyə göstəricilərini açıqlayıb
”Kapital Bank” ASC aktivlərini 904 milyon manat artırdığını, 52 milyon manatdan çox mənfəət qazandığını elan edib.
Bank bu ilin birinci yarısının maliyyə göstəricilərini açıqlayıb. Hesabata görə, onun faizlər üzrə gəlirləri (132.6 milyon manat) bu qəbildən olan xərclərini 87.7 milyon manat üstələyib. Qeyri-faiz xərcləri (72 milyon manat) isə gəlirlərindən 8.3 milyon manat çox olub.
Bank mənfəətinin bir hissəsini – 27.2 milyon manatı yarana biləcək zərərləri ödəmək üçün ehtiyatda saxlayıb. Nəticədə, 11 milyon 455 min manat mənfəət vergisi ödəyəndən sonra bankın səhmdarları 40.7 milyon manat təmiz mənfəət götürə biliblər.
”Kapital Bank” ASC-nin kredit portfeli son 12 ayda dəyişməyərək 1 milyard 181 milyon manat qalıb. Bank vəsaitlərinin bir hissəsini (205 milyon manat) dövlət qiymətli kağızlarına yerləşdirməli olub. İyulun əvvəlinə bankın aktivləri 3.2 milyard manata çatır.
Əhalinin və şirkətlərin banklardakı əmanət və depozitləri bu dövrdə 1 milyard 168 milyon manat artıb və iyulun əvvəlinə 2 milyard 332 milyon manata çatıb. Müflis banklardan əmanətlərini geri çəkən vətəndaşların bir hissəsi pulunu möhkəm valyutaya çevirib bu banka yatırır.
”Kapital Bank” ASC ölkə prezidenti İlham Əliyevin qızları – Leyla və Arzu Əliyeva bacılarının Azərbaycandakı çoxsaylı banklarından biridir və ”Paşa Holdinq” MMC şirkətlər qrupuna daxildir.
