Əraziyə təhlükəsizlik qüvvələrinin cəlb edildiyi deyilir
Noyabrın 2-də Əfqanıstanın paytaxtı Kabildəki ən böyük hərbi hospitalda partlayış baş verib.
Partlayışda azı 15 nəfərin öldüyü, 34 nəfərin isə yaralandığı bildirilir.
Taliban təhlükəsizlik rəsmisi “Reuters”ə bildirib ki, partlayış 2 dəfə olub və hələlik səbəbi məlum deyil.
Daxili İşlər Nazirliyinin sözçüsü Qari Səid Xosti isə deyib ki, partlayışlar Kabilin mərkəzindəki 400 çarpayılıq Sərdar Məhəmməd Daud Xan xəstəxanasının girişində baş verib.
Hazırda təhlükəsizlik qüvvələri əraziyə səfərbər edilib.
Həlak olanların sayı ilə bağlı heç bir təsdiqləmə olmasa da, adının açıqlanmasını istəməyən Taliban təhlükəsizlik rəsmisi azı 15 ölü və 34 yaralının olduğunu təsdiqləyib.
Partlayış yerindən təxminən 3 km aralıda travmatologiya xəstəxanasını idarə edən İtaliyanın təcili yardım qrupu indiyədək 9 yaralının gətirildiyini açıqlayıb.
Əraziyə yaxın yaşayan insanların paylaşdığı fotoşəkillərdə şəhərin Vəzir Əkbər Xan ərazisindəki keçmiş diplomatik zonanın yaxınlığındakı partlayışların baş verdiyi ərazinin üzərində tüstü dumanı görünür.
Şahidlərin dediyinə görə, ən azı iki helikopter ərazi üzərində uçur.
Hadisə ilə bağlı məsuliyyəti üzərinə dərhal götürən olmayıb.
Rəsmi “Bakhtar” Xəbər Agentliyi şahidlərə istinadən bir sıra İslam dövləti döyüşçülərinin xəstəxanaya daxil olaraq təhlükəsizlik qüvvələri ilə toqquşduğunu bildirib.
Avqustda Taliban Qərbin dəstəklədiyi əvvəlki hökumət üzərində qələbəsini başa vurduqdan sonra belə partlayışlar, hücumlar və qətllər artıb. Bu, onilliklərlə davam edən müharibədən sonra Əfqanıstanda təhlükəsizliyi bərpa etmək iddiasını sarsıdır.
Xəstəxanada qaçmağa müvəffəq olan bir tibb işçisi, bir neçə dəqiqəlik atəş səsləri ilə müşayiət olunan böyük bir partlayış səsi eşitdiyini söyləyib.
Onun sözlərinə görə, təxminən on dəqiqə sonra ikinci, daha böyük partlayış olub.
“Partlayışların və atışmaların genişlənən xəstəxana kompleksinin içərisində olub-olmaması aydın deyildi”, – deyə o bildirib.
Avqustda Taliban paytaxt Kabili ələ keçirdikdən sonra məscidlərə və digər hədəflərə silsilə hücumlar həyata keçirən İslam dövləti 2017-ci ildə xəstəxanaya kompleks hücum təşkil edib və nəticədə 30-dan çox insan həlak olub.
Qrupun hücumları Əfqanıstandan kənarda 2001-ci ildə Əl-Qaidə qrupunun ABŞ-a hücumu zamanı olduğu kimi, ölkənin silahlı qruplar üçün sığınacaq ola biləcəyi ilə bağlı artan narahatlığa səbəb olub.
Qış yaxınlaşdıqca milyonlarla insanı yoxsulluqla təhdid edən iqtisadi böhran Əfqanıstanda narahatlığı daha da artırıb.
Talibanın qələbəsindən sonra beynəlxalq dəstəyin qəfil geri çəkilməsi, şiddətli quraqlığın milyonlarla insanı aclıqla təhdid etdiyi kimi, Əfqanıstanın kövrək iqtisadiyyatını da iflasa uğratdı.
