Layihə rəhbəri mayın 20-dək azadlıqda olacaq
İranın məhkəməsi Britaniya-İran əsilli yardım işçisi Nazanin Zağari-Ratklifin (Zaghari-Ratcliffe) həbsdən müvəqqəti azad edilməsini bir ay daha uzadıb, – “Reuters” xəbər verir.
Mart ayının ortalarında 40 yaşlı Zağari-Ratklif minlərlə digər məhbusla birlikdə iki həftə müddətinə Tehranın Evin həbsxanasından azad edilmişdi.
“Zağarinin icazəsi aprelin 18-dək davam etməliydi. Lakin bu müddət mayın 20-dək uzadılıb”, – onun vəkil Mahmud Behzadirad dövlət xəbər agentliyi IRNA-ya deyib.
2016-cı ilin aprel ayında “Thomson Reuters” Fondunun layihə rəhbəri Zağari-Ratklif ailə ziyarətindən sonra qızı ilə birlikdə İngiltərəyə geri dönərkən Tehran hava limanında həbs edilib.
İranın dini quruluşunu devirmək planında ittiham olunduqdan sonra ona 5 il həbs cəzası verilib.
Onun ailəsi və media firması “Thomson Reuters” -dən müstəqil fəaliyyət göstərən fond ittihamları rədd edir.
Martın 17-də İran koronavirus epidemiyasına görə 85 minə yaxın məhbusu, o cümlədən siyasi məhbusları müvəqqəti azadlığa buraxıb.