XİN: “İranın pilotsuz təyyarələrinin Rusiya tərəfindən Ukraynada istifadə edildiyi sübut olunarsa, Tehran buna “reaksiya göstərəcək”
İran Rusiyaya pilotsuz təyyarələr verdiyini etiraf edib. Ölkənin xarici işlər naziri Hüseyn Əmirabdollahian dövlətə bağlı nəşrlərin dərc etdiyi şərhlərdə deyib ki, Tehran Ukrayna ilə müharibədən əvvəlki aylarda Rusiyaya “az sayda pilotsuz təyyarələr” verib.
“The National” yazır ki, İran daha əvvəl Moskvaya pilotsuz təyyarələr və digər silahlar göndərdiyinə dair artan sübutları təkzib etmişdi.
Belə ki, Ukrayna və onun qərb müttəfiqləri Tehranın Rusiyanın hücumunu dəstəkləmək üçün pilotsuz təyyarələr göndərdiyini bildirir. Avropa İttifaqı və ABŞ Moskvaya maddi dəstək verdiyinə görə İrana qarşı sanksiyaları gücləndirib.
Ukrayna bir müddət əvvəl bəyan etmişdi ki, İran istehsalı olan 300 pilotsuz təyyarəni vurub.
Eyni zamanda İranın Rusiyaya göndərilmək üçün 1000 raket və dron hazırladığı haqda məlumatlar var.
Hseyn Əmirabdollahian İranın Moskvaya raket göndərdiyini təkzib edib və deyib ki, İranın pilotsuz təyyarələrinin Rusiya tərəfindən Ukraynada istifadə edildiyi sübut olunarsa, Tehran buna “reaksiya göstərəcək”.
Prezident Vladimir Zelenski bu yaxınlarda Ukraynaya çoxsaylı hücumlarda, o cümlədən Kiyevin mərkəzindəki zərbələr zamanı yerləşdirilən İran istehsalı olan “Şahed” kamikadze dronlarını vuracağını vəd edib.
Düşmüş “Shahed” pilotsuz təyyarəsinin yanında danışan cənab Zelenskiy Moskvanın hava gücünün “qanadlarını kəsəcəyini” vəd edib.
Cümə günü NATO bildirib ki, Tehran münaqişədə istifadə etmək üçün Rusiyaya ballistik raketlər göndərə bilər.
Hərbi ekspertlər bu həftənin əvvəlində “The National” nəşrinə bildiriblər ki, İran Moskvaya daha 1000 pilotsuz təyyarə və raket göndərməyə hazırlaşır.
