MSK: “Parlament seçkisinə 2416 iddiaçı qatılıb, onların 689-u rəsmi olaraq qeydə alınıb”
Yanvarın 10-da, saat 18.00-da Milli Məclisə növbədənkənar seçkilərlə əlaqədar namizədin qeydə alınması üçün zəruri olan seçki sənədlərinin dairə seçki komissiyasına (DSK) təqdim edilməsi müddəti başa çatıb.
Bu barədə Mərkəzi Seçki Komissiyası məlumat yayıb.
Fevralın 9-na təyin edilmiş Milli Məclisə növbədənkənar seçkilərlə əlaqədar bu müddət 2019-cu il dekabrın 21-dən başlamışdı.
MSK-nın son hesabatına görə, fevralın 9-na təyin edilmiş parlament seçkisinə 2416 iddiaçı qatılıb, onların 689-u rəsmi olaraq qeydə alınıb.
Namizədin müdafiəsi üçün onun irəli sürüldüyü seçki dairəsinin ərazisində seçicilərin azı 450 imzası toplanmalıdır.
Təşviqat yanvarın 17-də başlanır.
Seçkidə qələbə üçün səs çoxluğu tələb olunur.
Səsvermənin nəticələri haqqında ilkin məlumat seçki günü verilir.
Seçki dairəsi üzrə nəticələrin müəyyən olunması, protokolun ona əlavə edilmiş sənədlərlə birlikdə MSK-ya təqdim olunması fevralın 12-dək bitir.
Mərkəzi Seçki Komissiyası fevralın 29-dək Milli Məclisə seçkiyə yekun vurub sənədləri Konstitusiya Məhkəməsinə göndərməlidir.
