Hərbçilərə rütbə və medallar verilib
Noyabrın 16-da Kəlbəcər və Laçın rayonları ərazisindəki Azərbaycan–Ermənistan dövlət sərhədində Ermənistan silahlı qüvvələrinin təxribatlarının və hücumlarının qarşısının alınmasına görə 97 hərbçi müxtəlif medallarla təltif olunub.
Onlardan 7 nəfərinə ölümlərindən sonra “Vətən uğrunda” və 3-cü dərəcəli “Rəşadət” medalları verilib.
Bu barədə Prezident İlham Əliyev dekabrın 27-də sərəncam imzalayıb.
Sərəncama əsasən, digər hərbçilər “İgidliyə görə”, “Cəsur döyüşçü”, “Döyüşdə fərqlənməyə görə” və “Hərbi xidmətlərə görə” medallarıyla təltif edilib.
Təltif olunanlar arasında general-mayor, polkovnik, polkovnik-leytenant, mayor, kapitan, baş leytenant, leytenant, gizir, çavuş, əsgər və digər rütbəli hərbçilər də var.
Eyni zamanda, bu gün polkovnik Münasib Babayevə “general-mayor” ali hərbi rütbəsi verilib.
Bundan əlavə, Səfərbərlik və Hərbi Xidmətə Çağırış üzrə Dövlət Xidmətinin 3 zabitinə general-leytenant, birinə isə general-mayor rütbəsi verilib.
