Minsk şəhərində keçirilən II Avropa Oyunlarında yüksək nəticələr göstərmiş Azərbaycan idmançıları və onların məşqçiləri mükafatlandırılacaq. Prezident İlham Əliyev bununla bağlı sərəncam
imzalayıb
.
Sərəncama əsasən, birinci yeri tutan hər bir idmançıya 50 min manat, onun şəxsi məşqçisinə 25 min manat; ikinci yeri tutan hər bir idmançıya 30 min manat, onun şəxsi məşqçisinə 15 min manat; üçüncü yeri tutan hər bir idmançıya 20 min manat, onun şəxsi məşqçisinə 10 min manat ödəniləcək.
Eyni zamanda milli yığma komandaların baş məşqçilərinə ən yüksək nəticə göstərmiş bir idmançıya görə şəxsi məşqçinin aldığı məbləğ qədər birdəfəlik mükafat veriləcək.
Sərəncamdan irəli gələn məsələləri həll etməsi üçün Nazirlər Kabinetinə tapşırıq verilib.
