“
Onlar baxışlarımı hörmətlə qarşılayırlar və məni hər zaman dəstəkləyiblər”
Honq Konq lideri Kəri Ləm (Carrie Lam) çərşənbə axşamı günü deyib ki, Çin onun hökumətinin ekstradisiya qanun layihəsini rəsmi olaraq geri götürməsini anlayır, hörmət edir və dəstəkləyir.
“Reuters” xəbər verir ki, Ləm hökumətin bu addımından sonra şəhərin aylardır davam edən siyasi qarışıqlıqdan ayrılaraq inkişaf etməsinə təkan verəcəyini deyib.
Mətbuat konfransında Ləmdən soruşulub ki, dəfələrlə şiddətlənən etirazlara baxmayaraq, insanların Çinə ekstradisiyasına icazə verən qanun layihəsini geri götürmək nə üçün bu qədər uzadılıb. Amma o sualdan yayınıb.
“Bunu düşüncənin dəyişməsi kimi təsvir etmək doğru deyil,” Ləm deyib.
O əlavə edib ki, qanun layihəsinin tamamilə geri götürülməsi onun hökuməti tərəfindən verilmiş qərar olub və Pekin bu qərarı dəstəkləyib.
“Bütün bu proses boyunca Xalqların Mərkəzi Hökuməti bizim niyə bunu etməli olduğumuzu başa düşəcək mövqe tutub. Onlar mənim baxışlarımı hörmətlə qarşılayırlar və məni hər zaman dəstəkləyiblər,” o deyib. Ləm jurnalistlərin sualını cavablandırarkən krem rəngli kostyum geyinib və bir gün əvvəl televiziya çıxışındakından daha az gərgin görünüb.
Ləm çərşənbə günü Çin ərazisini on illərdir bürüyən ən pis siyasi böhran vəziyyətinə gətirən qanun layihəsini geri götürüb.
Ləm həmçinin cəmiyyətdəki digər dərin iqtisadi, sosial və siyasi problemləri, o cümlədən gənclər üçün mənzil və mobillik məsələlərini həll etmək üçün dialoqun önəmli olduğunu vurğulayıb, bunun üçün bir platformanın açılmalı olduğunu açıqlayıb.
“Biz cəmiyyətdəki narazılığı aradan qaldırmağın yollarını tapmalı və həll yollarını axtarmalıyıq,” – o deyib.
Qanun layihəsinin geri götürülməsi demokratiya tərəfdarı olan etirazçıların beş tələbindən biri olub, baxmayaraq ki, bir çox nümayişçi və millət vəkilləri bu hərəkətin çox az, çox gec olduğunu bildirib. Digər dörd tələb etiraz aksiyalarına inqilab adının verilməsini dayandırmaq, nümayişçilərin hamısını azad etmək, polis zorakılığı ilə bağlı müstəqil sorğu keçirmək, Honq Konq insanlarına öz liderlərini seçmək azadlığı vermək olub.
