***
17.50.
Hilal Məmmədov saat 17:00-a yaxın DİN Baş Mütəşəkkil Cinayətkarlığa Qarşı Mübarizə İdarəsindən buraxılıb.
O, ”Turan”-a bildirib ki, sahə polis müvəkkili saat 11:00-da onun yanına gələrək bildirib ki, onu Bakı Baş Polis İdarəsinə çağırırlar. Ancaq o, H.Məmmədovu aldadaraq BMCQMİ-yə aparıb.
Öncə onu gənc əməkdaş dindirib və fevralda ölkədən qaçmış Şahin Mirzəli ilə çəkilmiş kollektiv fotonu göstərib:
“O, gözlüklü bir nəfəri göstərərək onun mən olub-olmadığını soruşdu. Mən cavab verdim ki, xeyr. Sonra məndən fotodakı digər adamlar barədə soruşdular”, – H.Məmmədov qeyd edib.
O deyib ki, heç zaman Ş.Mirzəli ilə tanış olmayıb. Polis özü fotodakıların kim olduğunu aydınlaşdıra bilər və bundan ötrü onu BMCQMİ-yə aparmağa gərək yox idi.
Sonra H.Məmmədovu hansısa rəsisin yanına aparıblar. O, “Tolışi sado” qəzeti haqda soruşub.
“Talış dilində qəzet dərc etdirmək nəyə lazımdır? Əgər hər kəs öz dilində qəzet dərc etdirsə onda nə olar?”, – özünü təqdim etməyən rəis deyib.
Öz növbəsində H.Məmmədov deyib ki, polisin qəzet nəşrilə bağlı heç bir iradı ola bilməz. Bu, Ədliyyə Nazirliyinin səlahiyyətinə aiddir.
Eyni zamanda, o qeyd edib ki, Azərbaycan Konstitusiyası hər millətin öz dilinin və mədəniyyətinin inkişafına zəmanət verir.
***
”Sahə müvəkkili onu bəzi sənədlərə qol çəkdirmək üçün çağırıb”’
İyunun 8-i, saat 11-00-da hüquq müdafiəçisi Hilal Məmmədovu Nizami rayonunun sahə müvəkkili müəyyən sənədlərə qol çəkdirmək üçün çağırtdırıb. Vəkili Xalid Bağırov indiyədək ondan xəbər olmadığını bildirib:
”Bu saatacan ondan xəbər ala bilməmişik”.
Hilal Məmmədov 2012-ci ildə Cinayət Məcəlləsinin dövlətə xəyanət, milli və dini ayrı-seçkiliyin salınması və qanunsuz narkotik maddənin saxlanması və yayılması (274, 283.2.2, 234.4.3-cü) maddələri üzrə ittiham olunub.
2013-cü il sentyabrın 27-də o, 5 il azadlıqdan məhrum edilib. 2016-cı ildə prezidentin əfv fərmanıyla azad olub.
