Nemət Əliyev: ”Nəzəri baxımdan müsbət addımdır”
Hesablama Palatasına dövlət və icmal büdcələrinə nəzarət ilə bağlı yeni səlahiyyət verilir.
APA-nın məlumatına görə, bununla bağlı Azərbaycan prezidenti İlham Əliyevin təqdimatı ilə “Büdcə sistemi haqqında” qanunun 11.15, 15.2, 16, 18.3, 20.1 və 18 maddələrinə əlavə və dəyişikliklər təklif edilir.
Layihəyə əsasən, növbəti büdcə ili üzrə dövlət büdcəsinin və icmal büdcənin layihəsi və sonrakı 3 il üçün icmal büdcənin göstəriciləri cari ilin sentyabr ayının 15-dək müvafiq icra hakimiyyəti orqanı ilə yanaşı, Hesablama Palatasına da təqdim olunacaq.
Sənədə görə, eyni zamanda növbəti büdcə ili üzrə dövlət büdcəsi mətbuatda dərc edildikdən sonra dövlət büdcəsinin gəlirlərinin və xərclərinin (funksional, iqtisadi və inzibati təsnifatların paraqrafları səviyyəsində) təsnifatı müvafiq icra hakimiyyəti orqanı tərəfindən Hesablama Palatasına təqdim ediləcək.
Digər düzəlişə görə isə, dövlət büdcəsinin gəlirlərinin icrasını təmin edən orqanlar, habelə onların regional və yerli bölmələri müvafiq icra hakimiyyəti orqanları ilə razılaşdırılmış formalara uyğun olaraq aylıq, rüblük və ilin əvvəlindən artan yekunla gəlirlərin təsnifatı üzrə hesabatları aidiyyəti üzrə müvafiq icra hakimiyyəti orqanı ilə yanaşı, Hesablama Palatasına da təqdim ediləcək.
Bundan başqa, büdcə təşkilatları və dövlət büdcəsindən maliyyə yardımları alan təşkilatlar həmin vəsaitlərdən istifadə barədə müəyyən olunmuş qaydada aylıq, rüblük və ilin əvvəlindən artan yekunla funksional, iqtisadi və inzibati təsnifat üzrə hesabatları müvafiq icra hakimiyyəti orqanı ilə yanaşı Hesablama Palatasına da təqdim ediləcək. Layihəyə görə, dövlət büdcəsinin icrası prosesində dövlət büdcəsinin gəlirlərinin və funksional, iqtisadi və inzibati təsnifat üzrə xərclərinin bölgüsündə dəyişiklik edildiyi təqdirdə, bu barədə məlumatlar müvafiq icra hakimiyyəti orqanı tərəfindən Hesablama Palatasına təqdim ediləcək.
Layihədə o da var ki, dövlət büdcəsinin icrası barədə illik hesabat və müvafiq qanun layihəsi növbəti ilin aprel ayının 25-dək müvafiq icra hakimiyyəti orqanı tərəfindən hazırlanaraq müvafiq icra hakimiyyəti orqanına və Hesablama Palatasına təqdim ediləcək.
Layihə Milli Məclisin plenar iclasına tövsiyə olunub və dekabrın 16-da müzakirəyə çıxarılacaq.
Təklifi Meydan TV-yə şərh edən iqqtisadçı Nemət Əliyev diqqəti bunu doğuran zərurətə yönəldib.
Onun fikrincə, əgər Hesablama Palatasına nəzarət funksiyasını həyata keçirəcək əlavə səlahiyyətlər verilirsə, bu, dövlət maliyyə vəsaitlərinin xərclənməsində çox ciddi problemlərin olduğunu göstərir:
“Çünki bu istiqamətdə fəaliyyəti Maliyyə Nazirliyi həyata keçirirdi. Nazirlik büdcə vəsaitlərinin xərclənməsi üzərində dövlət nəzarətini həyata keçirən orqandır. Neçə müddətdir dövlət vəsaitlərinin təyinatı üzrə xərclənmədiyi haqda o qədər faktlar ortaya çıxır ki, sanki nazirliyin səlahiyyətli işçiləri vəzifələrini unudublar. Konkret halda “Beynəlxalq Bank”ın misalında bu amil daha qabarıq üzə çıxdı. Maliyyə Nazirliyinin Müşahidə Şurasına rəhbərlıik etməsinə baxmayaraq, kredit vəsaitlərinin yoxa çıxması barədə anonslar yayıldı, hətta bunların geri qaytarılmasının mümkünsüzlüyü bildirildi. Ona görə dövlət nəzarətinin daha da təkmilləşməsini nəzərdə tutan tədbirlərin həyata keçirilməsi faydalıdır”.
Ancaq Nemət Əliyev dəyişikliklləri nəzəri olaraq əhəmiyyətli sayır:
“Əsas sual budur ki, Hesablama Palatası üzərinə düşən yeni missiyanı yerinə yetirə biləcəkmi? Doğrudanmı, palata maliyyə vəsaitinin yayındırılmasının qarşısını almaq gücündə olacaq? Yüksək səviyyədə siyasi iradə olsaydı, maliyyə və başqa nazirliklərdə kimsə vəsaiti öz təyinatından yayındıra bilməzdi. Deməli, problem daha yuxarı instansiyalardan qaynaqlanır. Ona görə ciddi nəticələr olacağına inanmıram, sadəcə, nəzəri baxımdan müsbətdir”.
