Nazirlik Türkmənistandan gələn toz dumanının atmosferin yuxarı təbəqələrinədək qalxdığını deyir
Ekologiya və Təbii Sərvətlər Nazirliyinin Ətraf Mühit üzrə Milli Monitorinq Departamentinin mütəxəssisləri Bakı və Abşeron yarımadasında havadakı tozun miqdarının sanitar normadan yüksək olduğunu bildirirlər.
Departamentin əməkdaşları avqustun 23-ü səhər saatlarında monitorinq aparıblar.
Bildirirlər ki, buna səbəb Türkmənistan ərazisindən daxil olan toz dumanının atmosferin yuxarı təbəqələrinədək qalxmasıdır.
Avqustun 26-dək havada tozun miqdarının bir qədər də artacağı proqnozlaşdırılır.
Bir neçə həftə öncə də Ekologiya və Təbii Sərvətlər Nazirliyinin Ətraf Mühit üzrə Milli Monitorinq Departamenti Bakıda havadakı tozun normadan artıq olduğunu açıqlamışdı. Onda buna səbəb havanın yağmursuz və küləkli olması göstərilmişdi.
