Gürcüstan hökuməti daimi yaşayış icazəsi olmayan xarici vətəndaşların çatdırılma xidmətləri, sərnişindaşıma və tur bələdçiliyi sahələrində işləməsini məhdudlaşdırmaq qərarına gəlib. Bu tədbirlər ölkədə əcnəbilərin məşğulluğunu tənzimləyən yaxın vaxtlarda sərtləşdirilmiş qanunvericiliyin bir hissəsi olan fərmanda əksini tapıb.
Qanunvericiliyə edilmiş dəyişikliklərə əsasən, 2026-cı il martın 1- dən qüvvəyə minəcək qaydalara görə, Gürcüstanda işləmək istəyən və daimi yaşayış icazəsi olmayan xarici vətəndaşlar iş icazəsi almalı olacaqlar.
Bu icazə yerli işəgötürənin və ya özünüməşğul xarici vətəndaşın müraciəti əsasında Səhiyyə və Əmək Nazirliyi tərəfindən verilməlidir.
Lakin hökumət 20 fevral tarixli fərmanla bir neçə sektor üzrə illik kvota mexanizmi tətbiq edib və çatdırılma xidmətləri, sərnişindaşıma və tur bələdçiliyi üçün kvotanı sıfır müəyyənləşdirib. Kvotaya tabe olan dördüncü fəaliyyət sahəsində — turistlər üçün dağ və xizək bələdçiliyi üzrə isə illik kvota 200 nəfər olaraq təyin edilib.
Bu qərar son illərdə sayları nəzərəçarpacaq dərəcədə artmış bir çox xarici vətəndaş üçün məşğulluq imkanlarını faktiki olaraq aradan qaldıracaq. Bu xüsusilə qida çatdırılması xidmətlərində özünü göstərir; burada yerli işçilərlə yanaşı, Cənubi Asiya ölkələri də daxil olmaqla xeyli sayda xarici işçi fəaliyyət göstərir. Taksi sürücüləri arasında da xarici vətəndaşların sayı müəyyən dərəcədə artıb.
Yeni qanunvericiliyə əsasən, icazəsiz işləməyə görə 2 000 lari (750 dollar) məbləğində cərimə tətbiq olunacaq və bu, həm işçilərə, həm işəgötürənlərə, həm də özünüməşğul şəxslərə şamil ediləcək. Təkrar pozuntu halında cərimə 4 000 lariyə (1 500 dollar), hər növbəti pozuntu üçün isə 12 000 lariyə (4 500 dollar) qədər artırılacaq.
Bundan əlavə, Gürcüstanda qanuni işləmək üçün bu qanuna şamil olunan xarici vətəndaşlar yalnız Əmək Nazirliyi tərəfindən verilən iş icazəsi ilə kifayətlənə bilməzlər. Onlar iş icazəsini aldıqdan sonra müvafiq viza və ya yaşayış icazəsi kateqoriyasına da malik olmalıdırlar.
Hökumət artıq Gürcüstanda işləyən xarici vətəndaşlar üçün keçid müddəaları da müəyyən edib:
- 1 mart 2026-cı il tarixinə ölkədə fəaliyyət göstərən özünüməşğul əcnəbilərə qarşı icra prosedurları 2026-cı il mayın 1-dən tətbiq olunacaq;
- Yerli işəgötürənlərlə artıq əmək münasibətləri qurmuş və 1 mart 2026-cı il tarixinə Əmək Nazirliyinin vahid bazasında aktiv qeydiyyat statusuna malik olan əmək miqrantları 2027-ci ilə yanvarın birinədək iş icazəsi və müvafiq yaşayış icazəsi almalıdırlar.
Qanun qaçqınlara, eləcə də Gürcüstan tərəfindən əlavə və ya müvəqqəti müdafiə verilmiş şəxslərə şamil olunmayacaq. Həmçinin ölkədə sığınacaq axtaran kimi qeydiyyata alınmış şəxslər, diplomatik nümayəndəliklərin və ya beynəlxalq təşkilatların əməkdaşları, Gürcüstanda akkreditə olunmuş beynəlxalq jurnalistlər, investisiya əsasında yaşayış icazəsi sahibləri və beynəlxalq razılaşmalarla nəzərdə tutulmuş digər istisnalar da bu qanunun əhatə dairəsinə daxil deyil.
Parlament tərəfindən 2025-ci ilin iyununda qəbul edilmiş dəyişikliklər hökumətin miqrasiya ilə bağlı getdikcə sərtləşən ritorikası fonunda qüvvəyə minir. Fevralın 13-də yayımlanan videoda Baş nazir İrakli Kobaxidze ictimaiyyətə söz verib ki, “Gürcüstan qeyri-qanuni miqrantlardan tamamilə azad ediləcək”.
Kobaxidze miqrasiya sahəsində əvvəlki hökumət addımlarına istinad edərək əmək qanunvericiliyinə edilən dəyişiklikləri də qeyd edib və bildirib ki, bu dəyişikliklər “ölkə iqtisadiyyatını və vətəndaşlarımızın maraqlarını lazımi şəkildə qorumağa imkan verəcək”.
Eyni zamanda, fevralın 18-də parlamentdə çıxışı zamanı Kobaxidze Gürcüstanda “ciddi işçi qüvvəsi çatışmazlığı” olduğunu vurğulayıb və qeyd edib ki, “xaricilərin iştirakı olmadan ölkədə bir çox infrastruktur layihələrini həyata keçirmək mümkün olmazdı”.
O əlavə edib: “Çatışmazlıq əsasən tikinti sektoruna aiddir, lakin bununla məhdudlaşmır. Qonaqpərvərlik sənayesində də ciddi işçi qüvvəsi boşluğu mövcuddur ki, bu da ölkəmizdə əmək miqrasiyasına ehtiyac olduğunu göstərir.”
Bu yazı ingilis dilindən tərcümə edilmişdir. Yazının əslini OC Media-dan oxuya bilərsiniz.
