Dövlət Sərhəd Xidməti (DSX) AXCP sədrinin müavini Gözəl Bayramlının saxlanması haqqında məlumat yayıb
25 may 2017-ci il tarixdə saat 22 radələrində Azərbaycan Respublikasının vətəndaşı Bayramova Gözəl Oruc qızı Gürcüstandan Azərbaycan ərazisinə keçərkən Qazax rayonunun Şıxlı sərhəd nəzarət buraxılış məntəqəsində Dövlət Gömrük Komitəsinin əməkdaşları ilə birgə keçirilmiş tədbirlər nəticəsində saxlanılıb, xəbəri APA yayıb.
“G. Bayramova özünü şübhəli apardığına görə əl yükünə baxış keçirilərkən bəyan edilməmiş 12 min ABŞ dolları məbləğində pul vəsaiti aşkar olunaraq götürülüb.
Faktla bağlı Dövlət Sərhəd Xidmətinin İstintaq və Təhqiqat İdarəsində Cinayət Məcəlləsinin 206.1-ci (qaçaqmalçılıq) maddəsi ilə cinayət işi başlanıb.
***
AXCP sədrinin müavininin çantasından saxta pul çıxdığı bildirilir
Dövlət Sərhəd Xidməti tərəfindən saxlanılan AXCP sədrinin müavini Gözəl Bayramlı barəsində cinayət işi qaldırılıb. Bu barədə məlumatı vəkil Elçin Sadıqov yayıb. Onun sözlərinə görə, G.Bayramlı Şəmkirdədir. Onun Bakıya gətirilməsi gözlənilir.
Hüquq müdafiəçisi Oqtay Gülalıyev isə yazıb ki, G.Bayramlının çantasından 10 min saxta ABŞ dollarının aşkarlandığı iddia olunur:
“Gömrük Keçid Məntəqəsinin əməkdaşları onu saxlayarkən çantasından 10 min saxta ABŞ dolları “çıxarıblar”. Hazırda onu Dövlət Təhlükəsizlik Xidmətinin (DTX), eləcə də Qaçaqmalçılıq və Gömrük Qaydalarının Pozulması ilə Mübarizə Baş İdarəsinin əməkdaşları dindirir. Təəssüf ki, bu məlumatları dəqiqləşdirmək imkanları qeyri- mümkündür.
Deyilənlər təsdiqini taparsa bu, Gözəl Bayramlıya, eləcə də onun üzvü olduğu AXCP- yə və Milli Şuraya qarşı hazırlanmış növbəti çox iyrənc və bədnam bir tərxibat cəhdidir. Cəhd baş tutsa belə, bu, Gözəl xanımdan və onun təmsil olunduğu təşkilatlardan heç nə aparmayacaq”.
Gözəl Bayramlının mayın 25-də Gürcüstandan qayıdarkən Qazax Sərhəd-Keçid Məntəqəsində saxlanıldığı bildirilir. Bu barədə ilk məlumatı AXCP sədri Əli Kərimli öz “Facebook” səhifəsində yayıb.
