Vəkil: “Şikayətdə işə məhkəmə istintaqı aparılmaqla baxılmasını tələb etmişəm”
Gənc fəal Bayram Məmmədov barəsində Bakı Ağır Cinayətlər Məhkəməsinin 8 dekabr 2016-cı il tarixli hökmündən apellyasiya şikayəti verilib. Bu barədə vəkil Elçin Sadıqov “Facebook” səhifəsində yazıb.
Vəkil bildirib ki, apellyasiya şikayətində işə qismən məhkəmə istintaqı aparılmaqla baxılmasını tələb edib:
“Bundan əlavə, Bayram Məmmədovun insan hüquqlarının və əsas azadlıqlarının müdafiəsi haqqında Avropa Konvensiyanın 3,5,6,8,10,13 və 18-ci maddələri ilə təminat verilən hüquqlarının pozulmasının tanınmasını istəmişik. Bakı Ağır Cinayətlər Məhkəməsinin 08.12.2016-cı il tarixli hökmünün ləğv edilərək, Bayram Məmmədova bəraət verilməsini tələb etmişik”.
Dekabrın 8-də Bakı Ağır Cinayətlər Məhkəməsində Heydər Əliyevin postamentinə “Qul bayramınız mübarək” şüarını yazıldıqdan sonra narkotik ittihamı ilə həbs olunan gənc fəal Bayram Məmmədov 10 il azadlıqdan məhrum edilib.
