Səudiyyə Ərəbistanı vətəndaşı azadlığa buraxılıb
Qətlə yetirilən jurnalist Camal Qaşıqçının ölümündə şübhəli bilinərək Fransada həbs edilən Səudiyyə Ərəbistanı vətəndaşı azadlığa buraxılıb.
“Aljazzera” yazır ki, prokurorlar çərşənbə axşamı Parisin Şarl de Qoll hava limanında saxlanılan şəxsin Camal Qaşıqçının ölümündə şübhəli bilinən səudiyyəli olmadığını müəyyənləşdirəndən sonra onu sərbəst buraxıblar.
Səudiyyə rəsmiləri daha əvvəl də bir səudiyyəlinin Parisin Şarl de Qoll hava limanında səhvən saxlanıldığını bildirmişdilər.
Çərşənbə axşamı Fransa hüquq-mühafizə orqanları bu adamın Xaled Ayed Əl-Otaibi olduğunu, ABŞ və Böyük Britaniyanın sanksiya sənədlərində və Birləşmiş Millətlər Təşkilatının sifarişli hesabatında qeyd olunan Səudiyyə Kral Qvardiyasının keçmiş üzvü ilə eyni adda olduğunu bildiriblər.
Səudiyyə Ərəbistanının Parisdəki səfirliyi çərşənbə axşamı günü axşam saatlarında həbs edilən şəxsin “sözügedən işlə heç bir əlaqəsi olmadığını” bildirib. Səudiyyə Ərəbistanındakı təhlükəsizlik mənbəsi əlavə edib ki, “Xaled əl-Otaibi” krallıqda çox yayılmış bir addır və fransızların tutduqlarını düşündükləri şəxs əslində işdə əli olan digər müttəhimlərlə Səudiyyə Ərəbistanının həbsxanasında cəza çəkir.
Sərhəd yoxlamaları zamanı şəxsin pasportu skan edildikdə məlum olub ki, Türkiyə tərəfindən verilən order hava limanında həbs edilən şəxsə şamil edilmir:
“Bu şəxsin şəxsiyyəti üzərində aparılan geniş yoxlamalar göstərdi ki, order ona şamil edilməyib… O, azad edilib”, – prokurorluğun bəyanatında deyilir.
“Washington Post” qəzetinin jurnalisti və Səudiyyə Ərəbistanının faktiki hökmdarı – vəliəhd şahzadə Məhəmməd bin Salmanın tənqidçisi olan Qaşıqçı sonuncu dəfə 2018-ci il oktyabrın 2-də Səudiyyə Ərəbistanının İstanbuldakı konsulluğuna daxil olarkən görüntülənib. Türkiyə rəsmiləri onun cəsədinin parçalanaraq çıxarıldığını düşünürlər. Onun qalıqları tapılmayıb.
Həbs xəbəri – onun həqiqətən də Türkiyə tərəfindən axtarılan adam olduğu düşünüldüyü zaman – hüquq qrupları və Qaşıqçının nişanlısı Hatice Cengiz belə yüksək profilli şübhəlinin mühakimə olunacağından rahatlıq ifadə edərək reaksiyalar dalğasına səbəb olmuşdu. BMT-nin 2019-cu il araşdırma hesabatında Əl-Otaibinin Qaşıqçının öldürülməsində iştirak edən 15 nəfərlik Səudiyyə komandasının üzvü olduğu bildirilir.
Xaled Əl-Otaibi adlı şəxs 2020-ci ilin oktyabrında başlayan məhkəmədə qətlə görə Türkiyə tərəfindən qiyabi ittiham irəli sürülən 26 səudiyyəlidən biridir. Günahı sübuta yetirilərsə, o, ömürlük həbs cəzası ala bilər.
Türkiyədə qiyabi mühakimə olunan 26 nəfərdən ikisi Məhəmməd bin Salmanın keçmiş köməkçiləridir. Heç bir Səudiyyə rəsmisi qətlə görə Türkiyədə şəxsən ədalətlə üzləşməyib. Əl-Otaibi həm də ABŞ Xəzinədarlığının qətldəki roluna görə 2018-ci ildə sanksiya təyin etdiyi 17 nəfərdən biridir.
2020-ci ilin sentyabrında Səudiyyə Ərəbistanı Məhkəməsi bu ölkədə qapalı məhkəmədən sonra çıxarılan beş ölüm hökmünü ləğv edərək, təqsirləndirilən şəxsi 20 il həbs cəzasına məhkum edib. Məhkəmə cinayətin təşkilatçılarının azadlıqda qaldığını bildirən BMT rəsmisi və insan haqları müdafiəçiləri tərəfindən tənqid edilib. ABŞ və Türkiyə rəsmilərinin bildirdiyinə görə, səfirlikdə gözləyən Səudiyyə zərbə qrupu Qaşıqçını boğaraq cəsədini parçalayıb. Dəhşətli qətl beynəlxalq qəzəb doğurub və Qərb kəşfiyyat agentlikləri Məhəmməd bin Salmanı qətlə icazə verməkdə ittiham ediblər.
“Aljazzera” yazır ki, Türkiyə prezidenti Rəcəb Tayyib Ərdoğan Qaşıqçının öldürülməsi əmrinin Səudiyyə hökumətinin “ən yüksək səviyyələrindən” gəldiyini söyləyib, lakin heç vaxt birbaşa Məhəmməd bin Salmanı günahlandırmayıb.
