”İnqilab liderinin razılığıyla onun cənəzəsi yandırılacaq”
Kuba inqilabının lideri Fidel Kastro 90 yaşında vəfat edib.
Bu barədə Lenta.ru Prensa Latina agentliyinə istinadən məlumat yayıb. Bildirilir ki, inqilab lideri noyabrın 25-də axşam dünyasını dəyişib.
Dövlət başçısı Raul Kastro qardaşı Fidel Kastronun vəfatıyla bağlı xalqa müraciət edib: “İnqilab liderinin razılığıyla onun cənəzəsi yandırılacaq. Dəfn haqqında yaxın saatlarda məlumat veriləcək”.
Fidel Kastro ötən əsrin 50-ci illərində Fulxensio Batista rejiminə qarşı mübarizəyə başlayıb. 1959-cu ildə inqilabın qələbəsindən sonra ölkəyə rəhbərlik edib. 2006-cı ildə səhhətində problemlər yaranıb və 2 il sonra səlahiyyətlərini qardaşı Raul Kastroya verib. 13 avqustda Fidel Kastronun 90 yaşı qeyd edilib.
