İlkin məlumata görə, yanğın təxminən 10 ha ərazini əhatə edib
Qızılağac Dövlət Təbiət Qoruğu ərazisində yanğın başlayıb.
Məlumatı Fövqəladə Hallar Nazirliyi (FHN)
yayıb
.
Bildirilir ki, “112” qaynar telefon xəttinə Lənkəran şəhəri, Balıqçılar qəsəbəsi, Qızılağac Dövlət Təbiət Qoruğu ərazisində yanğın olması barədə məlumat verilib: “Hazırda yanğının söndürülməsi istiqamətində operativ və təxirəsalınmaz tədbirlər həyata keçirilir”.
İlkin məlumata əsasən, təxminən 10 ha sahədə kol-kos yanıb.
FHN əlavə məlumatın veriləcəyini bildirib.
Son zamanlar Azərbaycanın bölgələrində tez-tez meşə yanğınları baş verir.
Qəbələdə, Lənkəranda, Masallıda, Yardımlıda yanan meşə əraziləri söndürülsə də, mütəxəssislər havaların isti keçməsi və başqa amillər ucbatından yenidən başlayacağından narahatdırlar.
Ötən ay fövqəladə hallar, ekologiya və təbii sərvətlər, kənd təsərrüfatı nazirlikləri əhaliyə müraciət edərək bildiriblər ki, əkin sahələrində, təbiət ərazilərində yanğın təhlükəsizliyi qaydalarına ciddi əməl edilsin.
Müraciətdə qeyd olunur ki, meşə sahələrində yanğınların əksəriyyəti yanğın təhlükəsizliyi qaydalarına riayət etməyən vətəndaşların, biçindən sonra sahələrə od vuran fermerlərin və təbiət qoynunda istirahət edən insanların odla ehtiyatsızlığından baş verir.
