”Saxlananlar İstanbul birjasının keçmiş əməkdaşlarıdır”
Türkiyədə İstanbul birjasıyla əlaqədar aparılan istintaq çərçivəsində 50-dən çox adam saxlanıb.
“Anadolu” xəbər agentliyi yazır ki, ölkənin altı bölgəsində cəmi 57 nəfər saxlanıb. Onlar ABŞ-da yaşayan ilahiyyatçı Fətullah Gülənlə bağlılıqda şübhəli bilinirlər.
Daha əvvəl “Haberturk” qəzeti yazmışdı ki, saxlananlar Borsa İstanbulun – İstanbul birjasının keçmiş əməkdaşlarıdır. İyulda prezident Rəcəb Tayyib Ərdoğana qarşı çevriliş cəhdindən sonra işlərindən uzaqlaşdırılıblar.
Ankara Güləni həmin cəhdin arxasında durmaqda ittiham edir və ABŞ-dan onun ekstradisiyasını istəyir. Gülən isə ittihamları rədd edir.
Ötən iyuldan bəri on minlərlə adam həbsə atılıb. 140 mindən çox dövlət qulluqçusu, akademik işdən çıxarılıb.
