Azərbaycan Beynəlxalq Bankının Dubay filialının rəhbəri Adil Hüseynov Bakıda saxlanılıb.
Məlumatı “Azadlıq” qəzeti yayıb.
Bildirildiyinə görə, Dubayda yaşayan Adil Hüseynovu Bakıya çağırıblar, burada isə o, DİN Mütəşəkkil Cinayətkarlığa Qarşı Mübarizə İdarəsinin (“bandotdel”) əməkdaşları tərəfindən saxlanılıb.
Adil Hüseynovun saxlanılması azərbaycanlı kredit oliqarxlarının bir neçə gün öncə başlayan həbs dalğası ilə əlaqələndirilir. A.Hüseynovun mənzilində və iş otağında axtarışlar aparılıb.
Adil Hüseynov mərhum polis zabiti Fətullah Hüseynovun oğludur. Polkovnik Fətullah Hüseynov digər polkovnik Hacı Məmmədovun bandası tərəfindən qətlə yetirilib.
Adil Hüseynovun vəkili Kamandar Nəsibov virtualaz.org-a bildirib ki, müvəkkilinə Cinayət Məcəlləsinin 178.3.2-ci (dələduzluq – külli miqdarda ziyan vurmaqla törədildikdə) maddəsi ilə ittiham elan edilib. DİN əməkdaşları A.Hüseynovun evində axtarış aparıblar: “Amma Adil Hüseynov barədə hələlik həbs-qətimkan tədbiri seçilməyib”.
Vəkil A.Hüseynovun saxlanmasının səbəblərinə də toxunaraq bildirib ki, Adil Hüseynov Dubaydakı xarici şirkətlərdən birinin meneceridir: “Onun çalışdığı şirkət isə bankdan kredit götürüb, amma kredit borcunu qaytarmayıb. Bu səbəbdən Adil Hüseynov da saxlanıb”.
